Мәскәүгә икенче Бөтенроссия туй фестиваленә Тукай районыннан яшь пар бара

Мәскәүгә икенче Бөтенроссия туй фестиваленә, Татарстан вәкилләре буларак, Тукай районында яшәүче яшьләр барачак. Бу хакта «Татар-информ» мәгълүмат агентлыгында «Гаилә атналыгы»на багышланган матбугат конференциясендә ТР Министрлар Кабинетының ЗАГС идарәсе башлыгы, Татарстанда «Нык гаилә» проектының төбәк координаторы Эльвира Әхмәтова әйтте.

Фестиваль 8-13 июль көннәрендә үтәчәк. Яшьләр – Алмаз Ситдиков һәм Алия Гафиятуллина татар милли киемнәрендә никахларын рәсмиләштерәчәк. Эльвира Әхмәтова әйтүенчә, хәзерге вакытта аларга милли туй костюмнары тегелә. Алмаз – күп балалы гаиләдән, тракторист булып эшли, Алия – булачак табиб.

• Узган елда фестивальгә Татарстаннан Саба районы яшьләре барган иде. Алар хакында «Интертат»та язма чыккан иде.

Мәскәүдә, шулай ук, «Күп балалы Россия» форумы узачак. Эльвира Әхмәтова анда республикадан Яшен Үзән вәкилләре – биш балалы Нуруллиннар гаиләсе барачагын әйтте. Гаиләнең иң олы баласына – 9 яшь, кечкенәсенә – 2 ай.