Қазақстанда бұрынғы вице-министр ұсталды
Еңбек және халықты әлеуметтік қорғау бірінші вице-министрі болған, сондай-ақ "Еңбек ресурстарын дамыту орталығы" АҚ-ның басшысы қызметін атқарған Ақмәди Сарбасов ұсталды, - деп хабарлайды Tengrinews.kz тілшісі.
Оның ұсталғанын Еңбек және халықты әлеуметтік қорғау министрлігі растады.
"Министрлік тергеу органдарына белгіленген тәртіпте көмек көрсетіп жатыр. Тергеу барысына қатысты барлық сұрақ уәкілетті органдардың құзыретінде", – деп хабарлады ведомство.
Еске салайық, Сарбасов биыл сәуірде басқа жұмысқа ауысуына байланысты еңбек вице-министрі қызметінен кеткен еді. Ол бұл қызметті 2020 жылдың маусымынан бастап атқарып келген.
Бұл ретте, Telegram-дағы Kozachkov offside арнасында бұрынғы вице-министрдің ұсталуына мемлекеттік дерекқорлардан алынған ақпаратты коммерциялық ұйымға беру схемасының әшкереленуі себеп болуы мүмкін екені айтылған. Тергеу соты жеке компания басшысын және бұрын вице-министр болған екі жоғары лауазымды шенеунікті қамауға алуға санкция берген.
"Бірінші кредиттік бюро" ЖШС басшысы Руслан Омаровқа айып тағылып, бұрынғы орталық басшысы Дәулет Арғандықов та қамауға алынған.
Жарияланған мәліметке сәйкес, тергеу барысында Еңбек министрлігінің құрылымы болып табылатын "Еңбек ресурстарын дамыту орталығы" АҚ азаматтардың табыстары мен әлеуметтік төлемдері жөніндегі құпия ақпаратты "Бірінші кредиттік бюро" ЖШС-не бергені анықталған. Бұл мәліметтерге жедел қол жеткізу үшін ПКБ VPN арқылы жүйелі түрде пара беріп отырған.
Сілтемесіз жаңалық оқисыз ба? Онда Telegram желісінде парақшамызға тіркеліңіз!