Саудӣ барои "Роғун" ва роҳи ҳалқавии Кӯлоб $130 млн дод
Подшоҳии Арабистони Саудӣ ва Фонди саудии рушд барои сохтмони нирӯгоҳи барқи обии “Роғун” 100 миллион ва ҳам барои амалисозии лоиҳаи сохтмони роҳи ҳалқавии шаҳри Кӯлоб 30 миллион доллари амрикоӣ ихтисос дод. Дар ин бора рӯзи 3 июл сомонаи президенти Тоҷикистон хабар додааст.
Дар ин замина рӯзи панҷшанбе мулоқоти президент Эмомалӣ Раҳмон бо Раиси Фонди Саудии Рушд Султон Абдурраҳмон Ал-Маршад баргузор шуд ва ҳамкории Тоҷикистон бо ин бунёд мавзӯи асосии гуфтугӯҳо будааст.
Манбаъ менависад, ки раҳбарияти Тоҷикистону Фонди саудии рушд “маблағгузории лоиҳаҳои муҳими соҳаҳои маориф, нақлиёт, тандурустӣ, гидроэнергетика ва идоракунии об”-ро баррасӣ карданд.
Тоҷикистон то чанд соли пеш дувумин кишвари бузурги кӯмакгиранда аз Маркази имдодии Шоҳи Саудӣ дониста мешуд. Арабистони Саудӣ ба Тоҷикистон миллионҳо доллар кӯмак кардааст.