“СҚ-Фармация“ төңірегіндегі даудан кейін басшылығы ауысты
"СҚ-Фармация" ЖШС-ға жаңа басқарма төрағасы тағайындалды. Бұл қызметке Нұрлыбек Асылбеков кірісті, - деп хабарлайды Tengrinews.kz тілшісі.
Денсаулық сақтау министрлігінің баспасөз қызметі мәліметінше, Нұрлыбек Асылбеков бұл қызметке тағайындалғанға дейін Шымкент қаласының Денсаулық сақтау басқармасын басқарған.
Айта кетейік, Денсаулық сақтау министрлігі "СҚ-Фармация" ЖШС-нің бұған дейінгі басшысы Еркен Жақатай жұмыстан шығарылғанын хабарлаған жоқ. Алайда ақпарат әлеуметтік желілерде тарап кетті. Кейбір мәліметтер бойынша Еркен Жақатай басқа жұмысқа ауысуына байланысты қызметінен босатылған.
"СҚ-Фармация" ЖШС - тегін медициналық көмектің кепілдік берілген көлемі және Қазақстандағы міндетті әлеуметтік медициналық сақтандыру жүйесі шеңберіндегі дәрілер мен медициналық бұйымдардың бірыңғай дистрибьюторы. Компания елдегі медициналық мекемелер үшін дәрі-дәрмектерді сатып алады, сақтайды және тасымалдайды.
Бұған дейін не белгілі?
Еске салайық, бұған дейін Мәжіліс депутаты Бақытжан Базарбек қылмыс белгілері барын айтып, "СҚ-Фармация" басшылары жай ғана жұмыстан босатылғанына күмән келтірді. Депутат арыз жазуға уәде беріп, оларды Антикор, ҚМА және Бас прокуратураға тапсыруды талап етті.
Кеше ол "СҚ-Фармация" ЖШС, Дәрілік заттарды сараптау ұлттық орталығы, Бірыңғай дистрибьютор және еліміздегі фармацевтикалық компаниялардың қызметіне қатысты Бас прокуратураға арыз түсірді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!