Ўзбекистон картошка етиштиришда Миср тажрибасидан фойдаланади

Ўзбекистон картошка етиштириш соҳасида Миср тажрибасидан фойдаланади, деб Nova24.uz хабар берди.

EastFruit маълумотига кўра, уруғлик картошка етиштириш бўйича ҳамкорликка оид меморандум имзоланди. Ушбу келишувни Мисрнинг EFC Plants компанияси ва Ўзбекистоннинг «Агро Голд Премиум» компанияси Қоҳирада бўлиб ўтган қишлоқ хўжалиги бизнес-форуми доирасида имзолашди.

Форумда Қашқадарё вилояти тадбиркорлари ва Мисрнинг етакчи агросаноат компаниялари иштирок этди. Учрашув доирасида Ўзбекистон делегацияси Мисрнинг қишлоқ хўжалиги маҳсулотлари, хусусан, картошка ва қанд лавлаги етиштиришдаги тажрибасини ўрганди.

Ушбу билимлар Ўзбекистонда юқори сифатли уруғлик картошка етиштиришда ҳамда аграр соҳага инвестиция жалб этишда қўлланилади.

Шунингдек, форумда картошкачилик ва қанд саноати бўйича тажриба алмашилди ва Ўзбекистон агросаноатига инвестиция киритиш истиқболлари муҳокама қилинди.

Томонлар келгусида уруғлик картошка ишлаб чиқаришнинг тўлиқ циклини Ўзбекистонда локаллаштириш лойиҳасини амалга оширишни режалаштирмоқда.