რუსეთის კომუნისტური პარტიის ყრილობის თანახმად, სტალინის პიროვნების კულტის შესახებ ხრუშჩოვის მოხსენება „მცდარი“ იყო

5 ივლისს მოსკოვის ოლქში, „სნეგირის“ გამაჯანსაღებელ კომპლექსში გამართულ თავის ყრილობაზე რუსეთის კომუნისტურმა პარტიამ მიიღო რეზოლუცია, რომლითაც საბჭოთა კავშირის მაშინდელი ლიდერის ნიკიტა ხრუშჩოვის მოხსენება სტალინის პიროვნების კულტის შესახებ „მცდარად“ გამოაცხადა.

დოკუმენტში ნათქვამია, რომ რუსეთის ფედერაციის კომუნისტურ პარტია საჭიროდ მიიჩნევს „შეაფასოს, როგორც მცდარი და პოლიტიკურად მიკერძოებული“ ნიკიტა ხრუშჩოვის მოხსენება „პიროვნების კულტისა და მისი შედეგების შესახებ“, რომელიც წარმოდგენილი იყო საბჭოთა კავშირის კომუნისტური პარტიის XX დახურულ ყრილობაზე 1956 წლის 25 თებერვალს.

ეს მოხსენება მიეძღვნა სტალინის პიროვნების კულტის, მასობრივი ტერორისა და 1930-იანი წლების მეორე ნახევრის - 1950-იანი წლების დასაწყისის დანაშაულების დაგმობას, რომლებშიც პირადად სტალინი იყო დადანაშაულებული.

ხრუშჩოვის ეს მოხსენება ე.წ. „დათბობის“ დასაწყისად ითვლება.

გარდა ამისა, ყრილობამ 81 წლის გენადი ზიუგანოვი ხელახლა აირჩია რუსეთის ფედერაციის კომუნისტური პარტიის ცენტრალური კომიტეტის თავმჯდომარედ - ის ამ თანამდებობას 1993 წლიდან იკავებს.

თავად პარტიის ოფიციალური სახელწოდება შეიცვალა და ეწოდა „პოლიტიკური პარტია - რუსეთის ფედერაციის კომუნისტური პარტია (ყოფილი პოლიტიკური პარტიის სახელწოდება იყო „რუსეთის ფედერაციის კომუნისტური პარტია“).