მოსკოვის ოლქის ორ ქალაქში აფეთქებები იყო

დღეს, 7 ივლისს გამთენიისას აფეთქებები იყო მოსკოვის ოლქის ქალაქებში, კარსნოზავოდსკსა და სერგიევ-პოსადში. რუსული და უკრაინული ტელეგრამ-არხები ადგილობრივ მცხოვრებთა ინფორმაციაზე დაყრდნობით იუწყებიან უპილოტო საფრენი აპარატებით შეტევის შესახებ.

სერგიევ-პოსადზე დრონებით შეტევა იყო 4 ივლისსაც. იმავე დღეს უკრაინის შეიარაღებული ძალების გენერალურმა შტაბმა განაცხადა, რომ 4 ივლისს სერგიევ-პოსადში დაარტყეს რუსეთის ფედერალურ სამეცნიერო-საწარმოო ცენტრს, რომელიც რუსული არმიისთვის აწარმოებს „შაჰედის“ ტიპის უპილოტო საფრენი აპარატების თერმობარულ საბრძოლო ნაწილებს.

სერგიევ-პოსადიდან ათ კილომეტრშია ქალაქი კრასნოზავოდსკი, სადაც ქიმიური ქარხანა მდებარეობს. დღევანდელი შეტევის შესახებ უკრაინას ჯერჯერობით არაფერი უთქვამს.

რუსეთის თავდაცვის სამინისტროს მიერ დილით გამოქვეყნებული ინფორმაციით, გასული ღამის განავლობაში მოსკოვის რეგიონში „გაანადგურეს და გზად დაიჭირეს“ 8 უკრაინული უპილოტო საფრენი აპარატი.

რუსეთის თავდაცვის სამინისტრო, როგორც წესი, არ აქვეყნებს მონაცემებს იმ დრონების შესახებ, რომელთა მოგერიება საჰაერო თავდაცვის სისტემამ ვერ შეძლო.