Իրենք զբաղված են պրիմիտիվ «կռուտիտներով»՝ զենքն օրինական է, նռնակի մեջ ոլոռ է, ո՞վ ասաց, որ միայն ապօրինի զենքն է մարդ սպանում. Հակոբյան
«Մեդիալաբի» հարցերին պատասխանում է ԱԺ «Քաղաքացիական պայմանագիր» խմբակցության պատգամավոր Հասմիկ Հակոբյանը
– Տիկի՛ն Հակոբյան, ՀՀ քննչական կոմիտեն վաղ առավոտից խուզարկություններ է անցկացրել մի շարք հասցեներում, որոնց թվում են նաև Դաշնակցության ներկայացուցիչներ: Քննչականից հաղորդում են, որ խուզարկությունները ահաբեկչության նախապատրաստության դեպքի առթիվ նախաձեռնված քրեական վարույթի շրջանակներում են ընթանում, բայց Դաշնակցության ներկայացուցիչները սա համարում են ընդդիմադիրներին լռեցնելու փորձ, իշխանության հերթական ռեպրեսիվ գործողություն:
– Պարզ է, որ դաշնակցականները պետք է այդպես ասեն, հո ինքնահայեցմամբ չէի՞ն զբաղվի: Իրականում իրենք զբաղված են հերթական արդարացումը փնտրելով, բայց Քննչական կոմիտեի տարածած հայտարարությունը բավարար է, որ իրականությունը երևա:
– Դուք գրառմամբ միտք էիք արտահայտել, որ ժամանակն է փակել Դաշնակցությունը: Ինչո՞ւ, ինչպե՞ս եք պատրաստվում դա անել, ու դա ձեր անձնակա՞ն տեսակետն է, թե՞ քաղաքական թիմի:
– Դրանք միայն իմ էմոցիաներն են, ոչ մի նման քննարկում չկա, ես անգամ այդ մտքով չեմ կիսվել որևէ գործընկերոջ հետ, դա իմ անձնական կարծիքն է: Եթե այս մարդիկ զբաղված են ահաբեկչության պլանավորմամբ, դեռ քանի՞ դաշնակցականի տնից պետք է հանել այս ռազմամթերքը, ահաբեկչության պլանները:
Էլ չեմ ասում դաշնակցական Հրանտ Մարգարյանի մասին, որը, ի դեպ, Դաշնակցության Գերագույն մարմնի անդամ է, մեկ-երկու ամիս առաջ իր հարցազրույցում ասում էր, որ նոր հոկտեմբերի 27 է լինելու, որ դա անխուսափելի է, դա թացը չորի հետ կտանի, բայց, ըստ նրա, արդյունքը կլինի սրբություն սրբոց: Նա, ամենայն հավանականությամբ, հենց այս տեռորի մասին էր անոնս անում:
Եթե դաշնակցականներով հավաքվել ու նման բաներ են կազմակերպում, ապա դա տեռորիստական խմբավորում է, կուսակցության գործունեությունը դրա մասին չէ, այն քաղաքականությամբ զբաղվելու մասին է, այլ ոչ թե տեռորիստական ակտեր կազմակերպելու համար է, հետևաբար իրավիճակից այլ ելք, քան այդ խմբավորման փակումն է, ես չեմ տեսնում:
– Փաստորեն, համաձայն չե՞ք կարծիքներին, որ այս գործողություններով իշխանությունն ընդամենը փորձում է լռեցնել ընդդիմադիրներին:
– Ընդդիմությունը բարձր խոսողներից է, մենք էլ փորձում ենք լռեցնե՞լ, մենք ամիսներով խնդրել ենք այդ մարդկանց՝ գան, խոսեն, աշխատեն, իրենց պարտականությունները կատարեն: Ամիսներով այդ աթոռները դատարկ են եղել, իրենց լռեցնելը ո՞րն է: Նման խնդիր չկա, ուղղակի ուժային կառույցներն իրենց գործն են անում՝ բավարար ապացույցների վրա հիմնվելով: Մենք բոլորս հարկեր ենք վճարում, որպեսզի համապատասխան կառույցներն աշխատեն ու ապահովեն մեր անվտանգությունը, ինչն էլ անում են, ու ես շնորհակալ եմ մեր ուժային համակարգին իրենց կատարած աշխատանքի համար:
– Տիկի՛ն Հակոբյան, Բագրատ Սրբազանը պնդում է, որ ամբողջական ձայնագրությունը հրապարակվի, որպեսզի պարզ դառնա, որ խոսքը բնավ էլ ահաբեկչություն կազմակերպելուն չի վերաբերում: Ամբողջական տարբերակի հրապարակման անհրաժեշտություն տեսնո՞ւմ եք:
– Անկեղծ ասած, ես ոչ ցանկություն, ոչ էլ ժամանակ ունեմ, որպեսզի լսեմ ամիսների գաղտնալսումները, ի դեպ, դրանք արվել են օրինական կարգով, ես ուզում եմ էական բաները լսել, իսկ էականը հավաքված է այդ ձայնագրություններում: Իհարկե, Վազգեն Գալստանյանը կարող է պահանջել, որ ամբողջականը հրապարակվի, ու նրա փաստաբանը դրա իրավունքն ունի, բայց մենք գիտենք նաև, որ այդ նույն փաստաբանը չի հերքել, որ դա Բագրատ Գալստանյանի ձայնն է, պարզապես ասված է, որ կտրտված է խոսակցությունից, այո՛, կտրտած է, որովհետև անտրամաբանական կլինի հարյուրավոր ժամերի ձայնագրություն հրապարակել, ներկայացվում են այն կտորները, որոնք ուղիղ կապ ունեն մեղադրանքի հետ:
– Այսինքն՝ կարծում եք, որ եթե ամբողջական տարբերակը հրապարակվի, ապա դրանից բովանդակությունը չի՞ փոխվի, ինչպես պնդում է Բագրատ Սրբազանը:
– Եթե նրա համար մարդկանց պատերի տակ գյուլլելը, մասսայական հոսանքազրկումներն ու ավտոմեքենաներ այրելը սրբություն սրբոց է, ապա, իհարկե, դա ահաբեկչություն չէ: Խնդիրն այն է, որ այս մարդիկ կարծում են, թե իրենք լավ բան են անում, ինչպես Նաիրի Հունանյանը: Հիմա իրենք զբաղված են պրիմիտիվ «կռուտիտներով»՝ զենքն օրինական է, նռնակի մեջ ոլոռ է: Իսկ ո՞վ ասաց, որ միայն ապօրինի զենքն է մարդ սպանում, որ օրինականը չի սպանում, իրենք պարզապես կախվում են պրիմիտիվ «կռուտիտներից», բայց ես չեմ կարծում, թե մարդիկ հավատում են դրանց:
Քրիստինե Աղաբեկյան
MediaLab.am
The post Իրենք զբաղված են պրիմիտիվ «կռուտիտներով»՝ զենքն օրինական է, նռնակի մեջ ոլոռ է, ո՞վ ասաց, որ միայն ապօրինի զենքն է մարդ սպանում. Հակոբյան first appeared on MediaLab Newsroom-Laboratory.