Тер-Штеген келажаги борасида бир қарорга келди

Германиялик посбон Марк Андре тер-Штеген ёзда “Барселона”ни тарк этиш ҳақидаги миш-мишларга аниқ жавоб қайтарди. У ўз қарорини қабул қилди: ҳозирча жамоани тарк этмайди ва асосий дарвозабонлик учун кураш олиб боради. Бу ҳақда испан ОАВ хабар тарқатмоқда.

Маълумотларга қараганда, тер-Штеген ёзги трансфер ойнасида бошқа клубга ўтиш таклифларини кўриб чиқмаган. У клубдаги рақобатни қабул қилган ва ўз салоҳиятини яна майдонда намойиш этиш ниятида. Бироқ, агар янги мавсумда ҳам мураббийлар унга етарлича ишонч билдирмаса, 33 ёшли посбон қишки трансферда жамоани тарк этишни кўзламоқда, деб ёзмоқда маҳаллий журналистлар.

Эслатиб ўтамиз, тер-Штеген ўтган мавсумнинг деярли барча қисмида жароҳат билан олишган эди. У шифокорлар ва клуб мутахассислари ёрдамида фаол реабилитация жараёнини бошдан кечирди. Натижада, мавсум давомида фақат 9та ўйинда иштирок этишга муваффақ бўлди.

Шу билан бирга, у 2014 йилдан бери “Барса” сафида фаолият олиб бормоқда ва бу давр мобайнида кўплаб муваффақиятларга эришган. Унга бўлган ишонч ҳали ҳам мавжуд — фақат у соғлом ва ўзининг энг яхши спорт формасига қайтиши керак.

Тер-Штегеннинг амалдаги шартномаси 2028 йилга қадар амал қилади. Бу эса клубга у билан узоқ муддатли режаларни амалга ошириш имконини беради. Мухлислар эса бу тажрибали посбоннинг яна янги савияда ўзини намоён қилишига ишонмоқда.

Тер-Штегеннинг қолиши “Барселона” учун ҳам катта ютуқ бўлиши мумкин, чунки у жамоа учун нафақат профессионал, балки сардор сифатида ҳам муҳим шахс саналади.

Қишгача бўлган давр у учун имтиҳонга айланади. Агар у асосий таркибдаги ўрнини тикласа, у ҳолда унинг Каталония клубидаги тарихи яна давом этиши мумкин. Агар аксинча бўлса – унда янги манзил сари йўл олиши эҳтимоли бор.