Chevrolet янгиланган Onix ва Onix Plus моделларини намойиш қилди

Бразилияда Chevrolet компанияси Onix ва Onix Plus моделларининг янгиланган талқинларини тақдим этди, деб Kolesa хабар берди.
Хэтчбек ва седан кузовдаги моделлар ташқи кўринишда бироз янгиланган. Ҳар икки талқинда олд бампер ва радиатор панжараси янгиланди. Седаннинг орқа фаралари “шаффоф” услубда ишланган, хэтчбекнинг орқа қисми ҳам қайта дизайн қилинган.

Chevrolet Onix RS варианти катта спойлер, қора логотип ва 16 дюймлик дисклар билан жиҳозланган. Мультимедиа тизими ҳам янгиланиб, 11 дюймлик сенсорли экранга эга бўлди.

Қимматроқ комплектацияларда 8 дюймлик рақамли панель, кондиционер, орқа камера ва парковкада ёрдам тизими мавжуд. RS версиясида телефон учун симсиз қувватлаш функцияси ҳам бор.

Автомобилларга атмосфера ва турбо двигательлар ўрнатилган. Улар экологик талабларга мувофиқ янгиланган. Оддий двигатель қуввати 80–82 от кучини, турбоси эса 116–121 от кучини ташкил этади.

Янгиланган Onix ва Onix Plus моделлари яқин кунларда сотувга чиқиши кутилмоқда. Кейинроқ улар Лотин Америкасининг бошқа давлатларига ҳам етказилади.

Onix седани Ўзбекистонда ҳам ишлаб чиқарилади. Жорий йил бошидан бери 7 минг дона Onix сотилган. Янгиланган версиялар Ўзбекистон бозорига ҳам чиқиши мумкин.