Тошкентда таксичи қизга зўравонлик қилди
0
Ижтимоий тармоқларда Тошкентдаги зўравонлик ҳақида хабар тарқалди. Facebook'даги йирик саҳифаларда эълон қилинган маълумотларга кўра, такси ҳайдовчиси қизга тажовуз қилган.
Жабрланувчининг айтишича, унинг иш жойида “эшикдан эшиккача” тарифида етказиб бериш хизмати буюртма қилинган. Аммо ҳайдовчи офисга киришдан бош тортган ва буюртма берувчи ўзининг чиқишини талаб қилган.
Офисдан чиққан ходима буюртманинг тўланмаганини билмаган ва у билан пул бўлмаган. Жабрланувчи ҳайдовчини офисга кириб, пулни олиб кетишни таклиф қилган. Аммо ҳайдовчи унга бақириб, қўлларидан ушлаб силкиган, кейин эса қўлларини оғриқ билан қайириб, юборилган посилкани тортиб олган.
Қиз ушбу воқеа юзасидан расмий равишда ариза ёзган. Яндекс.Такси матбуот хизмати ушбу масала юзасидан изоҳ берди:
«Биз ҳолатдан хабардормиз, агрессив хулқ-атворга мутлақо йўл қўйиб бўлмайди. Курьер сервис буюртмаларидан четлатилди. Биз ички текширув олиб боряпмиз ва ҳуқуқни муҳофаза қилувчи органларга расмий сўров асосида барча маълумотларни тақдим этишга тайёрмиз», – дейилади билдирувда.