Илон Маск ва Дональд Трамп муносабатларининг сирли тарихи очиқланди

Дастлаб уларнинг муносабати дўстона, самимий ва ҳатто оилавий кўринишда бўлган. Бу ҳақда АҚШ президент маъмурияти раҳбарларидан бири Сюзан Уайлс New York Post подкастида маълум қилди. Унинг таъкидлашича, Илон Маск Дональд Трампни “деярли ота сиймосида” қабул қилган.

Уайлс ўз хотираларида шундай деб эслайди: “Президент уни жуда самимий қабул қилган, Илон эса жуда кўп ғоя ва имкониятларни таклиф қиларди. У одамлар ва технологиялар дунёсида чуқур билимга эга эди, биз эса кўп нарсани билмасдик”.

Трампнинг Мар-а-Лаго қароргоҳида Маск ҳатто меҳмон сифатида яшаган. Унинг муносабати Трампнинг оила аъзолари билан ҳам жуда яқин бўлган: улар Маскни “Элон амаки” деб аташарди. Бу бир вақтлар яқин ва ишончли муносабат бўлганини кўрсатади.

Бироқ вақт ўтиши билан бу алоқалар совиб кетди. Нега бундай бўлгани борасида Уайлснинг ўзи ҳам аниқ тушунчага эга эмас. “Мен тушунмаяпман, – дейди у. – Президент охиригача Маскни фойдали ва ишончли деб ҳисоблаган. Шунинг учун уларнинг йўллари ажралиши биз учун кутилмаган бўлди”.

Уайлснинг фикрича, Илон Маск — бугунги дунёга бошқачароқ назар ташлайдиган, ноодатий дунёқарашга эга бўлган шахс. Бу хусусиятини Трамп ҳам қадрлаган, унинг ғояларидан фойдаланган. Аммо дўстлик ва ҳамкорлик ҳар доим ҳам абадий бўлавермайди.

Бу воқеа нафақат икки машҳур шахс ўртасидаги шахсий муносабатлар ҳақида, балки сиёсат ва технология дунёсидаги алоқалар қандай тез ўзгариши мумкинлигини кўрсатиб турибди. Маск ва Трамп ўртасидаги яқинлик, сўнгги совуқлик ва тушунмовчиликлар кўплаб кузатувчилар учун ҳали ҳам сирлигича қолмоқда.