Эрон: Исроил Президентга суиқасд учун жавоб беради

Эрон расмийсига кўра, мамлакат президенти Масъуд Пезешкиёнга суиқасд уюштиришга уриниши учун Исроил товон тўлашга мажбур бўлади. Бу ҳақда у Al Jazeera телеканалига берган интервьюсида маълум қилди.

Президент Пезешкиённинг ўзига нисбатан суиқасд қилинганини аввалроқ маълум қилган эди. Ушбу ҳужум 12 кунлик ҳарбий тўқнашув пайтида амалга оширилган. Маълумотларга кўра, у пайтда давлат раҳбари Исроилнинг ҳужумларига қандай жавоб қайтариш масаласини муҳокама қилаётган йиғилишда бўлган.

Оммавий ахборот воситалари тарқатган маълумотларга кўра, Исроил авиацияси Эрон Олий хавфсизлик кенгаши йиғилиши ўтаётган бинога зарба берган. Манбалар бу операцияни “Ҳизбуллоҳ” етакчиси Ҳасан Насруллоҳга нисбатан амалга оширилган суиқасдга ўхшатмоқда.

Ҳужум чоғида Исроил самолётлари бинога кириш-чиқиш йўлларини нишонга олиб, эвакуация йўлларини тўсган. Расмийлар шошилинч чиқиш эшиги орқали бинодан чиқиб кетишга муваффақ бўлишган. Ана шу пайтда Пезешкиённинг оёғига шикаст етгани айтиляпти.

Эронлик амалдорнинг фикрига кўра, ушбу ҳужум Исроилнинг мамлакат ичида сиёсий тузумни издан чиқариш режасининг бир қисми бўлган.

Шу билан бирга, Пезешкиён ушбу воқеада АҚШнинг алоқаси бор, деган фикрни рад этган.