Питрәч ветераннары проекты Татарстан Рәисе грантлары бәйгесендә җиңде

Питрәч районы ветераннарының «Жить – Родине служить!» проекты Татарстан Республикасы Рәисе грантлары бәйгесендә җиңүче булды. Бу хакта «Алга» газетасы яза.

Проектның төп аудиториясе – «Шатлык» балалар һәм яшүсмерләр приютында тәрбияләнүчеләр.

Проектның төп максаты – үсеп килүче буынны ветераннарның, пенсионерларның һәм иҗтимагый оешмалар активистларының шәхси тәҗрибәсе аша патриотик тәрбияләү. «Көмеш волонтерлар» районның битараф булмаган башка кешеләре белән бергә питрәчлеләрнең илебез тарихына: Бөек Ватан сугышыннан алып Әфган конфликтына һәм махсус хәрби операциягә кадәр нинди өлеш кертүләрен искә төшерделәр. Советлар Союзы Герое Петр Гаврилов һәм Россия Федерациясе Герое Иван Додосов кебек герой-якташларга аерым игътибар бирелде.

Проект кысаларында төрле эш форматлары кулланылган. Балаларны Әлбәдәндәге Петр Гаврилов музеена һәм «Ленино-Кокушкино» музеена экскурсиягә алып барганнар. Алар өчен сугышчан хәрәкәтләр ветераны Фәрит Вәлиев белән очрашу оештырылган. Приютта тәрбияләнүчеләр «Георгий тасмасы», «Хәтер шәме» һәм башка акцияләрдә катнашкан, тыл хезмәтчәннәренә хуҗалыкта булышкан. Барлыгы 20гә якын чара үткәрелгән.

Грант акчаларын балалар өчен камуфляж костюмнар, футболкалар, патриотик язулы кепкалар һәм Россия символикасы төшерелгән башка атрибутика сатып алуга юнәлдерелгән. Волонтерларның үзләренә жилетлар сатып алынган.

Район ветераннар советы рәисе Эльгиза Фәйзуллина билгеләп үткәнчә, проект кече яшьтәге катнашучылар арасында патриотизм хисен сизелерлек арттырган.

«Үсеп килүче буын үз Ватаны белән горурлана, гуманитар ярдәм күрсәтү белән кызыксына башлады. Бу без ирешә алган иң мөһим әйбер», – дигән ул.