Кожо Суперлигага қайтди: “Нефтчи” янги ҳужумчи билан кучаяди

Қирғиз Республикаси ҳамда Эроннинг “Истиқлол” клуби сафида тўп сурган тажрибали ҳужумчи Жоэл Кожо яна Ўзбекистон Суперлигасига қайтди. Унинг агенти орқали тарқалган маълумотларга кўра, футболчи кеча Эрондан Ўзбекистонга етиб келган ва тез орада янги клуб билан шартнома имзолашини маълум қилган эди.

Эндиликда аниқ маълум — Кожо ўз фаолиятини Фарғонанинг “Нефтчи” клубида давом эттиради. Манбаларга кўра, унга Қаршининг “Насаф” жамоаси ҳам қизиқиш билдирган, аммо футболчи “Нефтчи”нинг лойиҳасига кўпроқ ишонган ва шу вариантни маъқул кўрган.

Жоэл Кожо Ўзбекистон футболи мухлисларига бегона эмас — у аввал “Динамо” жамоаси сафида икки мавсум тўп суриб, ўзини самарали ва ҳаракатчан ҳужумчи сифатида кўрсата олган. Унинг Суперлигага қайтиши “Нефтчи” ҳужум чизиғини мустаҳкамлашда муҳим аҳамият касб этиши мумкин.

Айни пайтда фарғоналиклар чемпионатнинг иккинчи ярмига жиддий тайёргарлик кўрмоқда. Янги трансфер эса жамоа мухлислари учун ҳам кутилган янгилик бўлди.

Сиз нима деб ўйлайсиз — Кожо “Нефтчи” сафида яна юқори даражада тўп сура оладими?