Әлмәт районы администрациясендә яңа кадр билгеләнде
Гомумшәһәр киңәшмәсендә Әлмәт районы башкарма комитеты җитәкчесе Гүзәл Хәбетдинова яңа кадр билгеләнү турында игълан итте. 11 июльдән район башкарма комитеты җитәкчесе урынбасары вазифасын Илвир Габдуллин башкара, дип яза «Татар-информ» хәбәрчесе Эльза Кузнецова.
Илвир Габдуллинның идарә итү эшендә тәҗрибәсе бай. Ул төрле елларда Татарстанның төрле муниципалитетларында шәһәр хуҗалыгы, транспорт һәм сәламәтлек саклау өлкәсендәге төп юнәлешләрне җитәкли.
Аның хезмәт биографиясендә Әлмәт шәһәре «Автомобиль юллары шәһәр идарәсе» предприятиесе директоры, Әлмәт муниципаль районы башкарма комитеты җитәкчесе урынбасары, «Әлмәт икмәк заводы» ААҖ башкарма директоры, «Альтранс» ҖЧҖ генераль директорының транспорт буенча урынбасары һәм «ПаркГрупп» ҖЧҖ генераль директоры булып эшләгән чорлар бар.
Моннан тыш, ул «АК БАРС МЕД» иминият компаниясе Мәҗбүри медицина иминияте департаментының Әлмәттәге төбәк вәкиллеген җитәкләгән. Шулай ук 2025 елның гыйнвар аеннан июнь аена кадәр Түбән Камада «Бердәм заказчы дирекциясе» белән җитәкчелек иткән.
Гүзәл Хәбетдинова хәбәр иткәнчә, яңа урынбасарга йөкләнгән өстенлекле бурычлар арасында – җылылык бирү сезонына әзерләнү, күпфатирлы йортларга капиталь ремонт ясау, инженерлык коммуникацияләрен контрольдә тоту, идарәче компанияләр һәм ресурслар белән тәэмин итүчеләр белән хезмәттәшлек итү. Шулай ук Илвир Габдуллин җәмәгать транспортын үстерергә, элемтә системасын, шул исәптән домофон һәм интернетны яхшыртырга тиеш булачак.
Яңа урынбасарны рәсми рәвештә яңа вазифага билгеләнүе белән котладылар һәм район халкының иминлеге өчен башкарган хезмәтендә уңышлар теләделәр.