Қазақстандық медицинаның аңызы Нина Каюпова өмірден өтті
Нина Каюпова, Қазақстан медицинасының аңызы, Акушерлік, гинекология және перинатология ғылыми орталығының негізін қалаушылардың бірі өмірден өтті, - деп хабарлайды Tengrinews.kz тілшісі Асфендияров атындағы Қазақ ұлттық медицина университетінің баспасөз қызметіне сілтеме жасап.
Нина Каюпова 1936 жылдың 1 мамырында Шығыс Қазақстан облысының Зайсан қаласында дүниеге келген. Ол 60 жылдан астам өмірін акушерлік пен гинекология саласына арнаған. Мансабында 30 мыңнан астам босануға қатысып, 25 ғылым докторы мен 40 ғылым кандидатын дайындаған. 19 монография мен 400-ден астам ғылыми мақала жариялаған.
Ол Қазақ акушерлік және гинекология ғылыми-зерттеу институтында, Ана мен бала денсаулығын қорғау республикалық орталығында жұмыс істеді, сондай-ақ 15 жыл бойы ҚазҰМУ-де дәріс берген. Соңғы жылдары жетекші ғылыми қызметкер және бейінді журналдың бас редакторы болды.
Оның басшылығымен экологиялық репродуктология атты жаңа бағыт дамыды. Нина Каюпова БҰҰ-ны қоса алғанда, халықаралық конференцияларға қатысқан. Қазақ КСР Жоғарғы Кеңесінің және ҚР Сенатының депутаты болған, бірқатар әлеуметтік заңдардың бастамашысы. Қазақстан әйелдер кеңесін және акушер-гинекологтардың Ұлттық қауымдастығын басқарған.
"Парасат", ІІ дәрежелі "Достық" ордендерімен, медальдармен марапатталған, Бейбітшілік пен рухани келісім үшін Мемлекеттік сыйлықтың лауреаты. Алматы қаласының Құрметті азаматы.
Нина Амировнамен қоштасу рәсімі 16 шілде күні сағат 10:00-де Алматы қаласындағы Concordia театрында өтеді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!