რუსეთი აცხადებს, რომ უკრაინას გადასცა კიდევ 1000 ჯარისკაცის ცხედრები
დღეს, 17 ივლისს რუსეთმა „სტამბოლის შეთანხმებების გაგრძელებით“ უკრაინას გადასცა შეიარაღებული ძალების კიდევ 1000 ჯარისკაცის ცხედრები. ამის შესახებ ტელეგრამ-არხზე დაწერა რუსეთის პრეზიდენტის თანაშემწემ, ვლადიმირ მედინსკიმ, რომელიც სტამბოლში უკრაინის დელეგაციასთან მოლაპარაკებებზე რუსეთის დელეგაციას ხელმძღვანელობდა.
მედინსკის ცნობითვე, რუსეთმა 19 მებრძოლის ცხედრები მიიღო.
უკრაინას ცხედრების დღევანდელ გაცვლაზე ჯერჯერობით არაფერი უთქვამს.
უკრაინა და რუსეთი დაღუპულთა ცხედრებისა და ტყვეების გაცვლაზე თურქეთის ქალაქ სტამბოლში 2025 წლის მაისსა და ივნისში გამართული მოლაპარაკებების შედეგად შეთანხმდნენ.
ერთი თვის წინ, 16 ივნისს, როცა რუსეთმა უკრაინას საომარი მოქმედებებისას დაღუპული კიდევ 1245 ადამიანის ცხედრები გადასცა, სამხედრო ტყვეთა საკითხებზე მომუშავე უკრაინულმა საკოორდინაციო შტაბმა განაცხადა, რომ სტამბოლში მიღწეული შეთანხმებით გათვალისწინებული ეს პროცესი დასრულებულია და უკრაინამ საერთო ჯამში, 6057 ცხედარი მიიღო.
პროცესში ჩართული იყო საერთაშორისო ჰუმანიტარული ორგანიზაცია „წითელი ჯვრის კომიტეტი“.