Электромобиллар нархи бензинли машиналардан тезроқ тушмоқда

АҚШда иккинчи қўлдаги электромобиллар нархи бензинда ҳаракатланувчи автомобильларга нисбатан анча тезроқ тушмоқда, деб хабар берди iSeeCars таҳлилий платформаси тадқиқотига таяниб Kursiv.media.

Тадқиқотга кўра, 2024 йил июнидан 2025 йил июнигача бўлган бир йиллик давр мобайнида электромобиллар нархи ўртача 4,8% га пасайган. Шу билан бирга, бензинли машиналар эса аксинча, 5,2% га қимматлашган.

Маълумотларга кўра, 1-дан 5 йилгача бўлган электромобилларнинг ўртача нархи 31 354 долларни ташкил этган, бу ўтган йилга нисбатан 1 569 долларга кам. Шунга қиёсан, ўша ёшдаги бензинли автомобиль нархи ўртача 32 525 доллар бўлиб, 1 594 долларга ошган.

iSeeCars бош таҳлилчиси Карл Брауэр бу ҳолатни шундай изоҳлади: “Иккиламчи бозордаги харидорлар энг аввало фойда беришини истайдилар. Бугунги кунда электромобиллар арзон бўлса-да, ўз қадрини тезроқ йўқотмоқда.”

Қийматини энг кўп йўқотган 10 та автомобил рўйхатида ҳам асосан электромобиллар устунлик қилмоқда. Tesla Model S, X ва Y моделлари сўнгги йилда 15,8% гача арзонлашган ҳолда биринчи учликни эгаллади. Шунингдек, Model 3 ва Porsche Taycan ҳам ушбу рўйхатдан ўрин олди.

Аналитиклар бундай тушишни бозордаги таклиф ҳаддан ташқари кўпайгани ва талабнинг пасайиши билан изоҳламоқда. 2024 йил июлидан бошлаб иккинчи қўлдаги электромобиллар сони бозорда 61,8% га ошган бўлса, бензинли машиналар сони фақат 22,2% га кўпайган.

Мутахассислар фикрича, вазият янада оғирлашиши мумкин. 2025 йил 1 октябрдан АҚШда янги ва ишлатилган электромобиллар хариди учун амал қилган федерал субсидиялар бекор қилинади. Бу эса EV’лар нархи янада тушишига ва харидорлар қизиқишининг пасайишига олиб келиши мумкин.