Исландияда вулқон яна отилди ва бу 9 маротабага фаоллашди

Исландиянинг жанубий-ғарбида жойлашган Рейкжанес ярим оролида яна бир бор вулқон отилиши қайд этилди. Бу 2023 йил охиридан бери ушбу ҳудудда рўй бераётган тўққизинчи вулқон фаоллиги бўлиб, деб Тҳе Гуардиан хабар берди.

Исландия Метеорология Институти (ИМО) маълумотига кўра, портлаш маҳаллий вақт билан соат 04:00 да бошланган. Лавалар ерда пайдо бўлган ёриқдан отилиб чиққани жонли эфирда акс этган. Кейинчалик асосий ёриқнинг узунлиги 2,4 км, яқин атрофда эса 500 метрлик иккинчи ёриқ ҳам юзага келгани аниқланди.

Ҳаводаги заҳарли газлар юқори даражада бўлгани сабабли, аҳоли уйда қолишга чақирилди. Машҳур Блуе Лагоон курорти ва унга яқин Гриндавик қишлоғи эвакуация қилинди.

Полиция комиссари Маргрет Кристин Паулсдоттирнинг айтишича, тахминан 100 киши хавфсиз тарзда кўчирилди. Баъзи сайёҳлар эса ҳудудга киришдан тўхтатилган.

ИМО геофизиги Бенедикт Офеигссоннинг фикрича, бу портлаш аввалгиларга қараганда кучсизроқ ва муҳим инфратузилмаларга таҳдид солмаяпти.

Сўнгги портлаш апрель ойида рўй берган эди. Ҳатто жорий ҳафта эълон қилинган хавф баҳосида кузгача янги отилиш кутилмагани қайд этилган.

Рейкжанесдаги вулқонлар 800 йил сукут сақлаган, аммо 2021 йил мартидан бери ҳудудда фаоллик кучайган. Мутахассислар бу ерни “янги вулқон даври” бошланган ҳудуд сифатида баҳолашмоқда.

РУВ хабарига кўра, бугунги отилиш халқаро авиапарвозларга таъсир қилмайди. Маълумки, 2010 йилдаги портлаш глобал авиаташувларга жиддий зарар етказган эди.

Исландияда 33 та фаол вулқон тизими мавжуд — бу Европадаги энг юқори кўрсаткич. Мамлакат ЕвроОсиё ва Шимолий Америка плиталари орасидаги Атлантика ўрта тоғ тизмаси устида жойлашган.