«Биш буын шагыйрьләре бергә» әдәби чарасында Фатих Кәрим әсәрләреннән перформанс була

23 июльдә 12.00 сәгатьтә «Яңа исем» әдәби лабораториясе Казандагы Фатих Кәрим һәйкәле янында «Биш буын шагыйрьләре бергә» дип исемләнгән әдәби чара оештыра. Яшь иҗатчылар фронтовик шагыйрь Фатих Кәрим әсәрләреннән шигъри перформанс тәкъдим итә.

«Шигъриятнең әлеге чарадагы беренче буынын Фатих Кәрим алып тора. Икенче буында – олпат шагыйрьләр Ренат Харис, Равил Фәйзуллин, Марсель Галиевлар. Өченче төркем – «Яңа исем» остазлары Ләбиб Лерон, Галимҗан Гыйльманов һәм Рафис Корбан. Урта буын шагыйрьләрдән Рүзәл Мөхәммәтшин, Гөлүсә Батталова, Фәнил Гыйләҗевләр чыгыш ясачак. Яшь буынны – «Яңа исем» проекты шәкертләре, аерым алганда Алинә Хәбибуллина, Айзат Вахитов, Таңчулпан Гыйләҗева, Айрат Шамс, Зөләйха Камаловалар тәкъдим итә», – дип хәбәр итә «Казан утлары» журналы редакциясе.

Шигырь кичәсендә һәр буыннан берәр җыр да яңгыраячак. Рөстәм Насыйбуллин, Илгиз Мөхетдинов, Рөстәм Гыйльфанов һәм Al Su чарада катнашкан шагыйрьләрнең җырларын башкара.

• «Яңа исем» иҗат лабораториясе – «Казан утлары» журналы каршында эшләгән әдәби мәктәп. Ул ТР Рәисе каршындагы Татар телен һәм Татарстан Рәисе каршындагы татар телен һәм Татарстанда яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән тормышка ашырыла. Проект татар әдәбиятында яңа исемнәр барлау, остазлар белән яңа әсәрләр иҗат итү, яшь каләм тибрәтүчеләргә иҗади мәйдан бирүне күз алдында тота.