Дәүләт Думасында Татарстанның өч закон чыгару инициативасы карала
Хәзерге вакытта Дәүләт Думасында өч закон чыгару инициативасы карала. Бу хакта ТР Дәүләт Советы Рәисе Фәрит Мөхәммәтшин VII чакырылыш республика парламентының 11нче утырышында хәбәр итте.
«Залда Дәүләт Думасының Татарстаннан депутатлары бар. Безнең инициативаларны алга җибәрүне контрольдә тотуыгызны сорыйм», - диде Дәүләт Советы башлыгы парламентарийларга.
Татарстанның тагын ике закон чыгару инициативасы Россия Закон чыгаручылар Советында, дип билгеләп үтте шулай ук Мөхәммәтшин.
Язгы сессиядә республика парламенты РФ Хөкүмәте Рәисе Михаил Мишустинга эчке эшләр органнары хезмәткәрләре өчен матди һәм социаль гарантияләрне арттыру турында мөрәҗәгать кабул итте, дип искәртте ул.