Эронда 51 даража: Абодон дунёдаги энг иссиқ шаҳарга айланди

Сўнгги кунларда Эроннинг Жанубий ҳудудларида ҳаво ҳарорати кескин ошди. Eldorado Weather сайтининг маълумотларига кўра, Абодон шаҳри охирги 24 соат ичида дунёдаги энг иссиқ шаҳар сифатида қайд этилди.

Манбага кўра, Абодонда ҳарорат 51 даража Цельсийга етган ва бу глобал иссиқлик кўрсаткичлари бўйича жуда юқори даража ҳисобланади. Шу билан бирга, дунёдаги энг иссиқ 15 шаҳар рўйхатига Эроннинг яна уч шаҳри — Омидийе, Аҳвоз ва Дезфул ҳам киритилган.

Метеорологларнинг таъкидлашича, Жанубий Эрондаги бундай юқори ҳароратлар «қизиб кетган ҳаво оқимлари» ва «атмосферадаги намлик даражасининг пасайиши» билан боғлиқ. Бу омиллар иссиқликни янада кучайтиради ва одамлар саломатлигига жиддий таъсир кўрсатиши мумкин.

Соғлиқни сақлаш ташкилотлари аҳолини эҳтиёт чораларини кўришга чақирмоқда. Айниқса ёш болалар, кекса инсонлар ва юрак-қон томир касалликларига чалинганлар тўғридан-тўғри қуёш нуридан ҳимояланиши зарур. Шифокорлар иш вақтида кўчага чиқмаслик, суюқлик истеъмолини ошириш ва ҳаво кондиционерларидан фойдаланишни тавсия қилмоқда.

Кузатувчиларга кўра, яқин кунларда ҳарорат яна ошиши мумкин. Шу боис, ҳудуд аҳолиси ва меҳмонлар хавфсизлик қоидаларига риоя этишлари зарур.