Миңнеханов Россиядә бруцеллез таралу фонында профилактик чараларны көчәйтүне таләп итте

Татарстан Рәисе Рөстәм Миңнеханов ТР Хөкүмәте йортында узган традицион киңәшмәдә хайваннардагы куркыныч авыруларны профилактикалау чараларын көчәйтергә кушты. Бу хакта республика җитәкчесенең матбугат хезмәте хәбәр итә.

Килеп туган вәзгыять турында ТР Министрлар Кабинетының Баш ветеринария идарәсе башлыгы Тимур Галиев сөйләде. Киңәшмә республиканың барлык муниципалитетлары белән видеоконференция элемтәсе режимында узды, анда Татарстан Премьер-министры Алексей Песошин да катнашты.

Докладчы сүзләренчә, Россиядә хайваннар арасында йогышлы авыруларның артуы күзәтелә. 2024 елда бөтен ил күләмендә 276 чыганак теркәлсә, 2025 елның беренче яртыеллыгында инде аларның саны 265кә җиткән.

«Республикабызда агымдагы ел башыннан алты чыганак теркәлде. Инфекциядән Чүпрәле, Чирмешән, Балык Бистәсе һәм Балтач районнары зыян күрде», - диде Галиев.

Иң күп чыганаклар (3) Балык Бистәсе районында ачыкланган. Барлык очракларда да законны бозып - килештермичә һәм ветеринария документларыннан башка кертелгән терлекләр бруцеллез чыганагы булды, дип аңлатты ул.

Татарстан ветеринария хезмәте агымдагы ел башыннан алып терлекләрне республикага рөхсәтсез кертүнең 29 очрагын ачыклаган. Нәтиҗәдә, 2 мең баштан артык авыл хуҗалыгы терлеге һәм 40 мең башка якын кош-корт карантинга куелган.

Бруцеллез таралу куркынычы аркасында ТР авыл хуҗалыгы һәм азык-төлек министры Марат Җәббаров җитәкчелегендә профильле штабның чираттан тыш утырышы узды. Барлык районнарда да гадәттән тыш хәлләр комиссиясе утырышлары үткәрелде, аларда бруцеллезны профилактикалау һәм терлекләрне рөхсәтсез кертү мәсьәләләре каралды.

Галиев искәрткәнчә, кеше авыру хайваннардан бруцеллез йоктырырга мөмкин. Нәтиҗәдә, кешеләрдә артрит, радикулит һәм башка авырулар көчәя. «Республикабызда мондый очраклар бар. Кайбер урыннарда хайваннарның хуҗалары һәм хезмәт күрсәтүче персонал бруцеллез йоктырды», - дип искәртте ТР Министрлар Кабинетының Баш ветеринария идарәсе башлыгы.