Венгриядагы мелдеште балбандар Медет кызы менен Жумашбек уулу байге алды
Кыргызстандык балбан кыз Айпери Медет кызы Венгриянын Будапешт шаарында өтүп жаткан Polyák Imre & Varga János Memorial эл аралык мелдешинде коло байгеге ээ болду.
Күрөш дүйнөсү уюмунун сайтындагы маалыматка таянсак, Медет кызы кыз-келиндер күрөшүнөн 76 килограмм салмакта чейрек финалда америкалык Даймонд Гуилфордду жеңип, жарым финалда бразилиялык Тамирес Мачадого утулган.
Ал эми коло байге үчүн таймашта болсо түштүк кореялык Сойеон Жеоңгду 12:1 эсебинде жеңип алган.
17-июлда башталган мелдеш бүгүн грек-рим күрөшү боюнча таймаштардан кийин аяктайт.
Буга чейин эркин күрөш боюнча таймаштарда кыргыз балбаны Тайырбек Жумашбек уулу 61 килограмм салмакта күмүш байгеге ээ болгон.