Дәүләт Думасы балаларны автокреслосыз йөрткән өчен штрафларны арттыруны хуплады

Дәүләт Думасының дәүләт төзелеше һәм закон чыгару комитеты балаларны автомобильдә махсус җайланмасыз йөртү кагыйдәләрен бозган өчен штрафларны арттыруны күздә тотучы закон проектын беренче укылышта кабул итәргә киңәш итте, дип хәбәр итте ТАСС.

Документны парламентка мартта Федерация Советының икътисади сәясәт комитеты рәисе Андрей Кутепов һәм комитет әгъзасы Игорь Тресков кертте. Закон проекты административ штрафларны арттыруны күздә тота: машина йөртүчеләр өчен — 3 мең сумнан 5 мең сумга кадәр, вазифаи затлар өчен — 25 мең сумнан 50 мең сумга кадәр, юридик затлар өчен — 100 мең сумнан 200 мең сумга кадәр. Үзгәрешләр РФ Административ хокук бозулар кодексының 12.23 маддәсенең 3 өлешенә кертелә.

Россия Хөкүмәте инициативаны хуплады, әмма аңлатма язуын камилләштереп бетерергә – тәкъдим ителгән штраф суммаларын аңлатучы исәпләүләр белән тулыландырырга киңәш итте. Гамәлдәге кагыйдәләр нигезендә, 7 яшькә кадәрге балалар махсус креслода яки автолюлькада йөртелергә тиеш.

7 яшьтән 11 яшькә кадәрге балаларга арткы утыргычта иминлек каешын эләктереп йөртергә рөхсәт ителә, ә алгы утыргычта элеккечә балалар креслосы кирәк. 12 яшьтән башлап балалар гомуми таләпләргә буйсынырга — теләсә кайсы утыргычта каеш эләктереп йөртергә тиеш.