Жейдон Санчо "Ювентус" учун МЮда ҳаммасини қурбон қилди

Жейдон Санчо фаолиятида навбатдаги йирик бурилишга жуда яқин турибди. Туриннинг машҳур клуби — “Ювентус” унга қаттиқ қизиқиш билдирган ва ҳозирда томонлар ўртасида келишувга эришилгани маълум бўлди.

Маълумотларга кўра, 24 ёшли англиялик ҳужумчи билан шахсий шартнома масаласида келишувга эришилган. Унга кўра, Санчо “Ювентус” билан 4 йиллик шартнома имзолайди ва ҳар мавсум учун 6 миллион евро маош олади. Бу маблағга бонуслар киритилмаган — улар кейинги музокараларда тасдиқланиши кутилмоқда.

Ҳозирги пайтда трансфер бўйича сўнгги тафсилотлар келишилмоқда. Туринликлар футболчининг агентлари билан музокараларни якунлаш арафасида ва яқин кунларда расмий эълонни амалга ошириш ниятида. Бу жараёнда клуб “Манчестер Юнайтед” раҳбариятини ҳам рўбарў қилаётган бўлиб, шартнома нархи ва қўшимча тўловлар (бонуслар, чиқиш пули ва бошқа моддалар) юзасидан муросага келишга ҳаракат қилинмоқда.

Санчонинг ўзи эса янги саҳифа очишга шошилаётган кўринади. У “Манчестер Юнайтед” таркибидан чиқарилган, Швециядаги “Лидс”га қарши бўлган ўртоқлик учрашуви учун таркибга киритилмаган ва АҚШдаги ёзги сафарга ҳам жалб этилмаган. Бу ҳолат Санчо учун МЮдаги имкониятлар тўлиқ тугаганини англатади.

“Ювентус” аввалроқ Санчо учун 15 миллион фунтлик таклиф билан чиққан. Аммо бу сумма “Манчестер Юнайтед” раҳбариятини қониқтирмаганди. Энди эса италияликлар музокараларда янги усулни қўлламоқда: улар чиқиш пулининг бир қисмини ўз зиммасига олиш ва бонусларни тўлаш орқали келишувни амалга оширишга интилмоқда.

Эътиборлиси шундаки, футболчининг ўзи ҳам трансфер содир бўлиши учун ташаббус кўрсатмоқда. У “Ювентус” сафига қўшилишни шунчалик истаяптики, ҳатто маошини икки баробарга камайтиришга тайёр эканини билдирган. Бу ҳолат Санчо учун асосий мақсад ўйин амалиёти ва ишончли муҳит эканини тасдиқлайди.

Таъкидлаш жоизки, Жейдон Санчо “Манчестер Юнайтед” сафида тўлиқ очила олмади. Мураббийлар билан келишмовчилик, жароҳатлар ва рақобат унга тўсқинлик қилди. Энди эса у Италияда ўзига хос қайта туғилишни бошлаш арафасида турибди.

Футбол жамоатчилиги эса ушбу трансфернинг якунларини катта қизиқиш билан кузатмоқда. Агар бу келишув амалга ошса, Санчо учун бу сўнгги имкониятлардан бири бўлиши мумкин — ўзини қайта исботлаш, майдонда ҳукмронлик қилиш ва мухлислар ишончини қозониш учун.