Хоразмдаги қовун сайлида таъм, санъат ва анъана уйғунлиги

Август ойининг илк кунларидан бошлаб, Хоразм вилояти яна бир бор сайёҳлар ва маҳаллий аҳоли диққат марказида бўлади. Ўзбекистон Туризм қўмитаси ва Хоразм вилояти ҳокимлиги ҳамкорлигида ташкил этилаётган анъанавий “Қовун сайли” бу йил янада катта кўламда ўтказилиши кутиляпти, деб хабар берди uzbektourism.uz.

Мазкур фестивал доирасида вилоятнинг барча шаҳар ва туманлари ўз ҳудудларида етиштирилган турфа хил қовунлар кўргазмаси ва савдосини ташкил этади. Павилонлар миллий анъаналар, ҳудудий услуб ва ранг-баранглик асосида безатилиб, ҳар бир меҳмонни ўзига тортадиган байрам муҳитини яратади.

Фақатгина ширин қовунлар эмас — бу фестивалда миллий маданиятнинг ҳар бир жиҳати намоён бўлади. Театрлаштирилган саҳна кўринишлари, қўғирчоқ театри намойишлари, миллий либослар дефилеси, машҳур Хоразм нонлари ва ўзгача таъмга эга таомлар савдоси ҳамда ҳунармандлар кўргазмалари — буларнинг барчаси “Қовун сайли”нинг ёрқин мазмунини тўлдиради.

Шунингдек, фолклор гуруҳлари ва бадиий жамоалар томонидан жонли ижрода куй ва қўшиқлар янграйди. Тасвирий ва амалий санъат асарлари билан қизиқувчилар учун эса махсус кўргазма ташкил этилади. Болажонлар учун эса қулай ва қизиқарли майдонлар, маҳорат дарслари тайёрлаб қўйилади.

Сайилда фаол қатнашганлар турли номинациялар бўйича Хоразм вилояти ҳокимлиги ҳамда ҳомийлар томонидан қимматбаҳо совғалар билан тақдирланади. Бу нафақат қатнашчилар учун рағбат, балки ҳар йили ушбу фестивалга бўлган қизиқишнинг ошиб боришига ҳам туртки бўлади.

Фестивалнинг энг шиддатли ва кутилган палласи — 8–9 август кунлари Хиванинг тарихий “Ичан қалъа” мажмуасида, ҳамда 10 август куни “Арда Хива” туризм мажмуасида бўлиб ўтадиган гала концертлардир. Уларда маҳаллий ва хорижий юлдузлар томонидан жонли ижро намойиш этилади, бу эса сайилнинг таъсирчан кайфиятини янада бойитади.

Бу нафақат қовун сайли, балки халқ ҳаёти, санъати, маданияти ва меҳмондўстлигининг ёрқин намоёни ҳамдир. Сайилда иштирок этиш — нафақат мазали қовунлардан баҳра олиш, балки ўзбек халқининг қадимий маданияти билан яқиндан танишиш имконияти ҳам демакдир.