Тестлар тугади: Энди эса ОТМ ва йўналиш танлаш вақти
24-июль куни 2025–2026 ўқув йили учун ОТМга кириш тест синовлари якунланди. Эндиликда абитуриентлар учун навбатдаги муҳим босқич — таълим муассасаси, йўналиш ва шаклини танлаш жараёни бошланди. Бу танлов учун 15 кун вақт ажратилган бўлиб, тахминан 7-августгача давом этади.
Танлов тартиби қандай?
Ўтган йилдан бошлаб олий таълимга қабул “аввал тест, кейин танлов” тамойили асосида амалга оширилмоқда. Энди эса абитуриентлар қуйидаги тартибда ОТМ ва йўналишларни белгилашлари мумкин:
1. Платформага кириш
Абитуриентлар my.uzbmb.uz платформасига кириб, “Олий ва профессионал таълим муассасаларига қабул” бўлими очилади, сўнг “Хизматдан фойдаланиш” тугмаси босилиб, “ОТМ танлаш” бўлимига ўтилади.
2. ОТМ ва йўналиш танлаш
Ҳар бир абитуриент:
Тест топширган фанлар мажмуаси ва таълим тили асосида, бештагача ОТМ ва таълим йўналишини кундузги, сиртқи ёки кечки шаклда танлаши мумкин. Бунда бир нечта йўналишни бир ёки турли олийгоҳлар доирасида танлаш мумкин. Шунингдек, “Танлов устуворлиги” ва “Мақсадли қабул” параметрларини ҳам белгилаш талаб этилади.
3. Маълумотларни тасдиқлаш
Танлов якунида “Сақлаш” тугмаси босилади. Шундан сўнг абитуриентнинг телефон рақамига тасдиқловчи SMS-код юборилади. Код киритилгандан сўнг танлов расмийлаштирилади.
4. Қайд варақаси
Танлов якунлангач тизимда “Абитуриент қайд варақаси” шаклланади. Унда:
Танланган ОТМлар, таълим шакли, йўналишлар акс этган бўлади. Абитуриент ушбу варақани юклаб олиши ёки истасa кейинчалик ўзгартириш киритиб, қайта юклаб олиши мумкин.
Якуний натижалар қачон эълон қилинади?
ОТМ ва таълим йўналишларини танлаш муддати тугагач, бир ҳафта ичида — яъни тахминан 14-августгача талабаликка тавсия этилган номзодларнинг якуний рўйхати эълон қилинади.
Натижалар Давлат қабул комиссияси томонидан расман эълон қилинади. Расмий манбаларни кузатиб бориш тавсия этилади.
Эслатма: Қабул квоталари
Аввалроқ эълон қилинган давлат квоталарига кўра:
-
Бакалавриат учун — 35 500 ўрин
-
Магистратура учун — 9 922 ўрин
Қабул квоталари фақат кундузги таълим шаклига тегишли.