“Манчестер Сити” Палмер учун рекорд пул тайёрламоқда

“Манчестер Сити” раҳбарияти ўзининг собиқ ярим ҳимоячиси Коул Палмерни жамоага қайтариш учун тарихдаги энг йирик трансферлардан бирини амалга оширишни режалаштирмоқда, деб хабар берди fichajes.net. Клуб катта эҳтимол билан Палмер учун 300 миллион еврога яқин миқдорда (250 миллион фунт стерлинг) пул таклиф этишга тайёргарлик кўрмоқда.

Маълумки, бир неча йил аввал “шаҳарликлар” Палмерни 45 миллион фунт эвазига Лондоннинг “Челси” жамоасига сотган эди. Ортиқча шов-шувсиз кетган футболчи сўнгги мавсумларда “аристократлар” таркибида ёрқин ўйини ва самарали ҳаракатлари билан ажралиб турди. Палмер “Челси” сафида муҳим шахсга айланиб, жамоа учун 18 та гол ва 14 та ассистни ўз ҳисобига ёздирган. Унинг фаолиятини юқори баҳолаган Transfermarkt портали ҳозирда унинг бозор қийматини 120 миллион евро деб белгилаган.

Манбалар маълумотига қараганда, “Манчестер Сити” аввал бошда 170 миллион фунтлик таклиф билан чиққан, аммо бу таклиф “Челси” томонидан рад этилган. Лондон клуби эса Палмер учун 250 миллион фунт стерлинг, яъни тахминан 297 миллион евро талаб қилмоқда. Агар бу битим амалга ошса, у футбол тарихидаги энг йирик трансферлар қаторига киради.

Кўпчиликнинг эътиборини тортган яна бир жиҳат — “Манчестер Сити” бош мураббийи Хосеп Гвардиоланинг Палмерни жамоага қайтаришга бўлган алоҳида истаги. Мураббийнинг таъкидлашича, Палмер бугунги таркибни янада кучайтиришга қодир ва келажакда клуб учун муҳим фигурага айланиши мумкин.

Шундай қилиб, Лондон клуби ҳозирча футболчи учун максимал фойда олишга интилмоқда. “Манчестер Сити” эса собиқ футболчисини ортга қайтариш учун рекорд маблағ ажратишга тайёрлигини аниқ кўрсатмоқда. Бу трансфер ёзги бозордаги энг катта интригалардан бири бўлиб қолмоқда ва мухлислар Палмернинг тақдири қандай ҳал бўлишини қизиқиш билан кузатмоқда.