Флик "Барса"да интизом ва талаблар босқичини оширди
Ла Лигада "Барселона"ни чўққига олиб чиққан тажрибали германиялик мутахассис Ханс-Дитер Флик янги мавсум арафасида футболчилар учун интизом ва талаблар даражасини сезиларли оширди. Янги бош мураббийнинг бу қарорлари клуб ихлосмандлари орасида катта қизиқиш уйғотмоқда.
Sport.es нашрининг ёзишича, энди "Барселона" аъзолари оммавий ахборот воситаларида ва ижтимоий тармоқларда фаол чиқишлардан воз кечишлари талаб этилмоқда. Бу қадам жамоанинг ички муҳитини яхшилаш ва футболчиларни асосий вазифаларига кўпроқ эътибор қаратиш учун қўлланмоқда.
Манбалар маълумотига кўра, янги қоидаларга асосан каталониялик юлдузлар иштирокидаги турли байрам ва тантаналар ҳам жиддий қисқартирилади. Барча маркетинг ва тижорий тадбирлар фақат эҳтиёткорлик билан, катта шов-шувсиз ташкил этилади. Бундай маросимлар асосий жамоанинг кунлик тайёргарлиги ва режасига мутлақо таъсир кўрсатмаслиги шартлиги алоҳида таъкидланди.
Шунингдек, Флик ўз шогирдларидан медиа фаолликни чеклаш, барча диққат ва кучини фақат футболга йўналтиришни талаб қилмоқда. Жамоадаги интизом ва уюшқоқликни янада ошириш мақсад қилинган.
Мухлислар бу қарорларнинг "Барселона"нинг янги мавсумдаги натижаларига қандай таъсир ўтказишини катта қизиқиш билан кузатишмоқда.