Бир неча давлатлар ҲАМАСни Ғазода ҳокимиятдан кетишни талаб қилмоқда

29 июль куни Яқин Шарқдаги можарога барҳам бериш ва Ғазода тинчликни тиклаш бўйича муҳим қадам ташланди. Миср, Қатар, Саудия Арабистони ва Иордания расмий равишда ҲАМАС гуруҳининг Ғазо секторидаги ҳукмронлигини тугатишни талаб қилувчи ҳужжатни имзолади, деб маълум қилди dpa ахборот агентлиги. Ҳужжатда шунингдек, Буюк Британия, Франция, Канада, Бразилия, Италия, Испания, Норвегия ва Ирландия каби нуфузли давлатлар ҳам ўз имзосини қўйгани қайд этилган. Айтилишича, Германия бу чақириқни ҳали қўллаб-қувватламаган давлатлар сафида қолмоқда.

Янги ҳужжатда Ғазода вазиятни барқарорлаштириш ва тинчлик йўлини топиш учун аниқ чоралар белгилаб ўтилган. Хусусан, ҲАМАС эксклавдаги ҳукмронлигини тўхтатиб, қуролларни халқаро ёрдам билан Фаластин маъмуриятига топшириши лозимлиги таъкидланади. dpa таъкидлашича, бу ҳужжатда 2023 йил 7 октябрда ҲАМАС томонидан Исроилга амалга оширилган ҳужум қораланган.

Манбага кўра, ушбу муҳим ҳужжат Нью-Йоркда ўтказилган икки давлат ечими бўйича халқаро конференцияда имзоланган ва сентябр ойига қадар БМТ томонидан расман қабул қилиниши кутилаяпти. Шу пайтгача яна бир қанча давлатлар ҳужжатни қўллаб-қувватлаши мумкин.

Ҳужжатда Исроилга қаратилган талаблар ҳам бор. Жумладан, унда имзо чеккан давлатлар яҳудий давлатидан Ғазо секторидаги ҳарбий ҳаракатларни ва Ғарбий соҳилдаги яҳудий кўчманчилар фаолиятини тўхтатишни сўрамоқда. Шунингдек, минтақада БМТнинг барқарорлаштирувчи кучларини шакллантириш таклифи ҳам илгари сурилган.

Яқин Шарқдаги тинчлик ва барқарорлик масаласи яна бир бор халқаро сиёсий майдонда энг долзарб мавзулардан бирига айланди. Янги ҳужжат ва унга қўшилаётган давлатлар сонининг ортгани — тинчлик йўлидаги ҳаракатлар янада жадаллашишига ишора қилмоқда. Экспертлар ва кузатувчилар бу жараён қандай ривожланишини катта қизиқиш билан кузатмоқда.