ტრამპმა უკრაინასთან შეთანხმების დასადებად რუსეთს 10 დღე მისცა
აშშ-ის პრეზიდენტმა, დონალდ ტრამპმა უკრაინასთან შეთანხმების დასადებად რუსეთს 10 დღე მისცა. ჟურნალისტებთან საუბრის აუდიოჩანაწერი თეთრი სახლის YouTube-ზე გამოქვეყნდა.
პოლიტიკოსის თქმით, ამის შემდეგ მოხდება მის მიერ დაპირებული ტარიფების შემოღება. თუმცა, ის დარწმუნებული არ არის იმაში, რომ ეს მოსკოვზე გავლენას მოახდენს, რადგან რუსეთის პრეზიდენტ ვლადიმირ პუტინს „აშკარად სურს, რომ ომი გაგრძელდეს“.
ტრამპმა გამოთქვა რწმენა, რომ ტარიფების შემოღება გავლენას არ მოახდენს ნავთობის მსოფლიო ფასებზე, რადგან აშშ-ს შეუძლია წარმოების გაზრდა.
მანამდე, პრეზიდენტმა პირობა დადო, რომ 100%-იან ტარიფებს დააწესებდა რუსეთის ექსპორტზე აშშ-ში, ასევე იმ ქვეყნების პროდუქციის ექსპორტზე, რომლებსაც სავაჭრო კავშირები აქვთ რუსეთთან. ასეთ შემთხვევაში, შეზღუდვები, შესაძლოა, სხვა ქვეყნებთან ერთად, ჩინეთს, ევროკავშირის ქვეყნებს, ინდოეთსა და თურქეთს შეეხოს. რუსეთთან ფართო სავაჭრო ურთიერთობა აქვს საქართველოსაც.
ტრამპმა ერთი დღით ადრე განაცხადა, რომ მოსკოვისთვის მიცემული ვადა 10-დან 12 დღემდე იქნებოდა. კრემლმა ტრამპის ნათქვამს უპასუხა, რომ ის „ცნობად მიიღო“.