Туриндустриянең булачак белгечләре өчен вузларга 80 меңнән артык бюджет урыны бүленде
2025 елда «Туризм һәм кунакчыллык» юнәлеше буенча Россия югары уку йортлары һәм урта һөнәри белем бирү учреждениеләре өчен 80 меңнән артык бюджет урыны бүленгән. Бу хакта Россия Хөкүмәтенең матбугат хезмәте РФ вице-премьеры Дмитрий Чернышенкога сылтама белән хәбәр итә.
Билгеләп үтелгәнчә, бүген Россиядә туризм һәм кунакчыллык индустриясе өчен белгечләр 200дән артык югары уку йортында һәм 300 көллияттә әзерләнә. Туризм белән бәйле югары белем бирү юнәлешләре буенча кабул итү кампаниясе кысаларында абитуриентлар инде якынча 130 мең конкурс төркеменә гариза биргән, ә урта һөнәри белем бирү учреждениеләренә 120 меңгә якын гариза юллаган.
«Россия Президенты Владимир Путин 2030 елга туристлар агымын елына 140 миллион кешегә кадәр арттыру бурычын куйды. Аңа ирешү өчен «Туризм һәм кунакчыллык» илкүләм проекты кысаларында масштаблы инвестиция проектлары гамәлгә ашырыла. Бүген туристлык өлкәсе өчен профильле белгечләр әзерләү төп әһәмияткә ия. 2025 елда «Туризм һәм кунакчыллык» юнәлеше буенча югары уку йортлары һәм урта һөнәри белем бирү учреждениеләре өчен 80 меңнән артык бюджет урыны бүленгән», – диде Чернышенко.
Бүгенге көндә туризм тармагында 1 миллионга якын кеше эшли, дип өстәде ул. 2024 елда мәгариф оешмалары туристлык тармагы өчен 55 меңгә якын кеше (шул исәптән югары белемле 6,4 меңнән артык хезмәткәр һәм урта һөнәри белемле 48 меңнән артык белгеч) әзерләгән.