Мәскәүдә узачак «Абилимпикс» чемпионатында Татарстаннан 16 кеше катнаша
Казанда тәмамланган махсус хәрби операциядә катнашучылар арасында Һөнәри осталык буенча «Абилимпикс» чемпионатының 79 финалисты арасында 16 кеше - Татарстан вәкилләре. Бүген Казанда узган брифингта «Ватанны саклаучылар» дәүләт фондының ТР буенча филиалы җитәкчесе Гүзәл Удачина шул хакта хәбәр итте.
Чемпионатта чыгыш ясаган Татарстан командасы составына 25 кеше керде. Республика командасы иң ишлесе булды, дип билгеләп үтте ул.
«11 муниципаль район үз егетләренә әзерлек барышында ярдәм кулы сузды. Лаеш районыннан - 7, Чаллыдан - 5, Түбән Камадан - 3, Биектау районыннан һәм Казаннан - икешәр, Югары Ослан, Алабуга, Кама Тамагы, Тәтеш, Яңа Чишмә һәм Чистай районнарыннан берәр ветеран бар иде»,-дип сөйләде Удачина.
Татарстаннан 25 вәкил чемпионатның мөмкин булган 15 компетенциясенең 11ендә чыгыш ясады. Ярыш программасы өч көн дәвам итте. Аның йомгаклары буенча татарстанлылар бик яхшы нәтиҗәләр күрсәтте.
Берьюлы ике татарстанлы «Пилотсыз очу аппараты операторы» номинациясендә лауреат булды. «Автомобильләрне ремонтлау һәм аларга хезмәт күрсәтү» номинациясендә бер кеше финалга чыкты. «Эретеп ябыштыру технологияләре» компетенциясендә республиканың тагын өч вәкиле, «Электрон җиһазларны сүтеп җыюда - бер, «Пешекчелек эше»ндә - ике, «Башкару осталыгы»нда ике вокалист финалга үтте. Аларның берсе – Илдар Карюков - чемпионатның рәсми ябылу тантанасында алып баручы булды.
«Сәнәгый робототехника» номинациясендә Татарстаннан бер ветеран финалга чыкты. Программистлар, фотографлар, слесарьлар һәм электромонтажчылар арасында да Татарстаннан берәр финалист бар.
«Без катнашкан барлык номинацияләр буенча финалга үттек. Сентябрьдә финалга әзерләнә башлыйбыз», - дип өстәде Удачина.
Аның сүзләренчә, финал Мәскәүдә 30 октябрьдән 3 ноябрьгә кадәр узачак.
Чемпионат РФ Президенты Владимир Путин йөкләмәсе нигезендә үтте. Ул «Яшьләр һәм балалар» илкүләм проектының «Профессионалитет» федераль проекты кысаларында узды.
Чемпионатны «Ватанны саклаучылар» дәүләт фонды ярдәмендә Россия Мәгариф министрлыгы һәм Татарстан Республикасы Хөкүмәте оештырды. Федераль оператор – Һөнәри белем бирүне үстерү институты, төбәк операторы – Татарстан Республикасы Һөнәри компетенцияләрне үстерү үзәге, эшлекле программа партнеры – Россиянең «Белем» җәмгыяте.