د پاکستان د پوځ په عملیاتو کې په باجوړ کې درې ملکیان وژل شوي
د خیبرپښتونخوا په باجوړ کې د پاکستان د پوځ له خوا په پیل شویو عملیاتو کې درې ملکیان وژل شوي او پنځه نور ټپیان دي.
د پولیسو یوه چارواکو د ازادي راډیو مشال برخې ته د نوم نه ښودلو په شرط ویلي، "پوځ په باجوړ کې په شدیده توګه عملیات روان کړي او پر سړکونو يې هرځای تالاشۍ پیل کړي دي".
د خیبرپښتونخوا اعلی وزیر علي امین ګنډا پور او د عوامي نیشنل ګوند دا عملیات غندلي او د دریدو غوښتنه يې کړې ده.
دا عملیات چې د وړمه ورځ د پاکستان د پوځ له خوا په سیمه د دوی په ټکو "د ترهګرو د له منځه وړو" په موخه پیل شوي د خلکو پراخ غبرګونونه يې راپارولي دي.
د دې عملیاتو پرضد وروسته له هغې د باجوړ په مومندو کې پراخ لاریونونه پیل شول چې د پوځ په ډزو کې د اووم ټولګي زده کوونکی ووژل شو.
د پاکستان د پوځ د عملیاتو له کبله په سیمه په زرهاوو کورنۍ د خپلو مېنو پریښودو ته اړ شوي دي.