Аббос Файзуллаев ЦСКАга самимий миннатдорлик билдирди
Ўзбекистон миллий терма жамоасининг иқтидорли ярим ҳимоячиси Аббос Файзуллаев ўзининг футболчи фаолиятида янги саҳифа очганини маълум қилди. У ЦСКА клубидан Туркиянинг нуфузли “Истанбул Башакшеҳир” жамоасига ўтиши муносабати билан қалбидан чиққан миннатдорлик сўзларини баён этди.
Аббос Файзуллаев билдиришича, унинг футбол йўлидаги энг йирик воқеалардан бири кеча амалга ошди. У ўзига ишонч билдирган, янги босқичга қадам ташлаш ва ўсиш учун зарур бўлган маслаҳатлар бергани учун ЦСКА клубига, унинг раҳбариятига ва мураббийлар Владимир Федотов ҳамда Марко Николичга алоҳида миннатдорлик билдирди. Футболчининг таъкидлашича, у ўз навбатида бу ишончни оқлаш учун доимо бор кучини ишга солиб, клубга максимал фойда келтиришга ҳаракат қилган.
Аббос ЦСКА клубидаги барча ходимларга, айниқса, илк кунларданоқ илиқлик ва кўмак кўрсатган жамоадошларига ҳам миннатдорлигини билдирди. Файзуллаевнинг сўзларига кўра, айнан ушбу жамоа саъй-ҳаракатлари орқали у Ўзбекистон терма жамоасида ўз ўрнига эга бўлиб, унутилмас лаҳзаларга гувоҳ бўлган: Олимпия ўйинларида қатнашиш ва 2026 йилги Жаҳон чемпионатига йўлланма олиш.
“ЦСКА ва барча “армиячилар”нинг ғоявий мухлисларига раҳмат айтаман! Клубга юракдан омад, катта ғалабалар ва фаровонлик тилайман. Биз ҳамиша дўст бўлиб қоламиз, мен эса доимо сизларни қўллаб-қувватлайман. ЦСКА мен учун доимо биринчи бўлиб қолади!” — дейди Файзуллаев.
Аббос Файзуллаев энди “Истанбул Башакшеҳир” футболчиси сифатида янги чақирувни қарши олишини таъкидлади. Унинг фикрича, бу янгилик унинг фаолиятига янги ранг, кучли мотивация ва руҳий баркамоллик олиб келади. Туркия маданияти ва урф-одатлари ўзбек халқига яқин эканлигини, бу мамлакатда кўплаб қизиқарли янгиликлар ва ёқимли воқеалар кутаётганини таъкидлади.
Аббоснинг фикрича, Туркия чемпионати кучли рақобат ва юқори даражадаги курашлар билан машҳур, “Истанбул Башакшеҳир” эса ҳар йили чўққи учун курашади. Янги жамоасига юқори натижалар қайд этишда ёрдам бериш, айниқса, еврокубокларда илк бор ўйнаш уни қувонтириши, Конференциялар Лигасида жамоага муносиб ҳисса қўшиш нияти борлигини айтди.
“Қадрли “Истанбул Башакшеҳир” мухлислари, яқин кунларда сизлар билан учрашишни сабрсизлик билан кутяпман!” — дея ўз мурожаатини якунлади Аббос Файзуллаев.
Янги босқич, янги имконият ва янги муҳитда ўзини кўрсатиш — футболчининг олдида катта вазифалар турибди. Мухлислар эса, Аббосбекдан янги ғалабалар ва ёрқин ўйинлар кутишмоқда.