Қарзга ароқ сўраган йигит калтак еб вафот этди

Тошкент вилоятида ароқ олиш мақсадида дўконга кирган ёш йигит вафот этди. Жамоатчиликда қизғин муҳокамаларга сабаб бўлган.

Маълумотларга кўра, 1996 йилда туғилган йигит дўконга кириб, қарзга ароқ сўраган. Сотувчи унинг сўровини рад этган ва ўзаро тортишув юзага келган. Шу пайтда жабрланувчи оғир ҳақоратли сўзлар айтгани боис, дўкончи уни мушт билан урган.

— У мени ҳақорат қилди, мен эса ўзимни ҳимоя қилдим. Ачиняпман. Яқинларидан узр сўрайман, — деган сотувчи.

Зарба оқибатида йигит ерга йиқилиб, бошидан жиддий жароҳат олган. У шифохонага етказилган, аммо шифокорлар унинг ҳаётини сақлаб қололмаган. Суд тиббий экспертизаси хулосасига кўра, ўлим бошга келиб урилган кучли зарба сабабли юз берган.

Айбланувчига нисбатан жиноят иши қўзғатилган. Ҳозирда суд жараёни давом этмоқда. Бу воқеа икки оила ҳаётини абгор қилган ва жамиятда ичкиликбозликнинг оқибатлари ҳақида жиддий ўйлашга чорламоқда.