Volkswagen ноқонуний қурилмалар учун жавобгар деб топилди

Европа Адлия суди Германиянинг Volkswagen автомобиль компаниясини чиқинди газларини яшириш учун ишлатилган махсус қурилмалар учун жавобгар деб топди.

Гап “defeat device” деб аталадиган махсус дастур ва қурилмалар ҳақида кетмоқда. Улар автомобиллар синовдан ўтаётганида зарарли газ чиқиндиларини сунъий равишда камайтиради. Суд бундай қурилмалар ҳатто автомобиль техник талабларга жавоб берган тақдирда ҳам ноқонуний эканини таъкидлади.

Мазкур қарор Германияда Volkswagen’га қарши очилган иккита суд иши асосида чиқарилган. Бу автомобилларда ушбу қурилмалар ишлаб чиқариш босқичида ёки кейинчалик дастурий янгиланиш орқали ўрнатилгани аниқланган.

Суд, автомобиль харидорларига етказилган зарар учун компенсация тўланиши кераклигини билдирди. Бу компенсация автомобилдан фойдаланиш муддати ҳисобга олинган ҳолда камайтирилиши мумкин, лекин харид нархининг 15 фоизидан кам бўлмаслиги керак.

Volkswagen вакиллари ушбу қарорга изоҳ берар экан, компания учун катта ўзгариш бўлмаслигини, чунки кўпчилик даъволар Германияда аллақачон ёпилганини айтди.

Эслатиб ўтамиз, “defeat device” — бу машина чиқиндиларини назорат қилиш тизимини алдов йўли билан бошқарадиган махсус қурилма ёки дастурдир.