АҚШлик автопойгачи янги рекорд ўрнатаман деб ҳалок бўлди

Америка автоспорт олами яна бир қайғули янгилик билан силкиниб кетди. Таниқли автопойгачи, 60 ёшли Крис Рашке Юта штатидаги машҳур Бонневилл шўрхокларида жаҳон рекордини ўрнатишга уриниб, ҳаётдан кўз юмди. Бу ҳақда расмий маълумотни Жанубий Калифорния хронометраж уюшмаси (SCTA) тарқатди, деб хабар берди People нашри.

Маълумотларга кўра, Рашке пойга бошланишига икки ярим милдан ортиқ йўл босиб ўтгач, автомобил устидан назоратни йўқотган. Ҳодиса жойида унга шошилинч тиббий ёрдам кўрсатилган бўлса-да, олинган оғир жароҳатлар туфайли унинг ҳаётини сақлаб қолишнинг иложи бўлмаган.

«Крисга дарҳол тиббий хизмат кўрсатилди. Аммо афсуски, олинган тан жароҳатлари унинг ҳаётини олиб кетди. Ҳозирда воқеа сабаблари пухта ўрганилмоқда», — дейилади расмий баёнотда.

The Guardian таъкидлашича, Рашке ҳайратомуз равишда 455 км/соат тезликка етиб борган. Аммо у аниқ қайси тезлик рекордини янгилашга ҳаракат қилгани расман очиқланмаган. Бу маълумот ҳозирча сир сақланмоқда.

Бу воқеа нафақат спорт оламида, балки бутун автоҳавасмандлар учун ҳам оғир зарба бўлди. Чунки Бонневилл шўрхоклари йиллар давомида юксак тезликка интилаётган пойгачилар учун муқаддас макон саналади. Бу текис ва оқ шўр юза, дунё бўйлаб ўнлаб янги рекордларнинг гувоҳи бўлган.

Юта штатидаги Солт-Лейк-Ситидан 160 км ғарбда жойлашган ушбу майдон, нафақат спорт, балки кино дунёсида ҳам алоҳида мавқега эга — “Мустақиллик куни” ва “Дунёдаги энг тезкор Indian” каби машҳур фильмлар айнан шу ерда суратга олинган.

Крис Рашке нафақат профессионал автопойгачи, балки тезликни ўз ҳаётининг маъносига айлантирган шахс сифатида эсланади. Унинг орзу ва ҳаракатлари, афсуски, шўрхокда тўхтади. Аммо унинг жасорати ва юракдан ишлаган меҳри бутун автофанатлар хотирасида абадий сақланади.

Автопойга одамлари ва мухлислар бу ҳолатдан катта сабоқ чиқариши аниқ. Юракни титратувчи ушбу воқеа нафақат рекордлар ортида қандай хавфлар ётганини, балки ҳар бир пойгачи ҳаётида қанчалар фидокорлик борлигини яна бир бор намоён қилди.