Университет хабари ҳаётга қайтарди: Хэнаньлик қиз комадан чиқди
Хитойнинг Хэнань вилоятида яшовчи 18 ёшли Цзян Ченнань исмли қиз универститетга қабул қилингани ҳақидаги хабарни эшитгач, мураккаб тиббий аҳвол — кома ҳолатидан кўзини очди. Бу воқеа нафақат унинг оиласи, балки бутун Хитой оммавий ахборот воситаларини ларзага солди, деб ёзмоқда Pravilamag.
Цзян Ченнань жорий йилнинг 11 июлида, мамлакатдаги энг муҳим имтиҳон — гаокао (ўқишга кириш миллий тест) ни топширганидан сўнг, юрак қисилиши ва иссиқликдан шикоят қилиб шифохонага мурожаат қилган. Унда оғир касаллик — фульминант миокардит (юрак мушагининг тезкор яллиғланиши) аниқланди. Бу ташхис кўпинча ҳаёт учун хавфли ҳисобланади. Қизни бошқа шифохонага кўчиришди, аммо у ерда у кома ҳолатига тушиб қолди.
Қизнинг опаси таъкидлашича, уларнинг оиласи анчадан бери молиявий қийинчиликларга дуч келмоқда. Отаси 2023 йилдаги автоҳалокатдан сўнг фақатгина таёқда юра олади. Онаси кундалик тирикчилик учун кўчада таом сотади. Оилада яна бир ўғил бола бор — у ҳозирча ўрта мактабда таҳсил олмоқда. Шу билан бирга, Цзяннинг даволаниши учун кетган харажат миқдори 200 минг юан (қарийб 2,2 миллиард сўм) дан ошиб кетди.
Қиз комада ётганига саккиз кун бўлганида, отаси унинг университетга қабул қилингани ҳақидаги мактубни олди. У бу хурсанд хабарни шифохонага олиб кириб, қизига қўрқув ва умид аралаш шивирлаб:
«Биз ҳаммамиз жуда хурсандмиз, сен университетга кирдинг!» — деди. Шу пайт қизнинг кўз қовоқлари қимирлаганини кўрди.
Ортидан, эртаси куни Цзян Ченнань комадан чиқди. Шифокорлар уни ота-онаси билан видеоқўнғироқ орқали боғлашди. Қиз бармоғи билан "ок " ишорасини берди — бу ҳаётга қайтишнинг, умиднинг ва орзуларнинг жавобидек туюлди.
Ота журналистлар билан суҳбатда қуйидагича сўзлади:
«Молиявий аҳволимиз оғир бўлса ҳам, мен уни албатта университетга жўнатаман. Бу — унинг ҳаётий орзуси», — деди.