Радмир Беляев «Батырлар. Татарстан Геройлары» программасы җиңүчесенең остазы булды

Түбән Кама районы башкарма комитеты җитәкчесе Радмир Беляев махсус хәрби операция ветераны Рихат Бәширов белән очрашты.

Түбән Кама хәрбие «Батырлар. Татарстан Геройлары» республика программасы җиңүчесе булды һәм хәзер экология өлкәсендә социаль проект тормышка ашырачак. Бу эштә аның остазы Радмир Беляев була.

Махсус операциядә хезмәт иткән вакытта Рихат Бәширов взвод командиры булган. Яраланганнан соң өенә кайта һәм актив гражданлык тормышы алып бара. Күптән түгел ул «Абилимпикс» һөнәри осталык чемпионатында да уңышлы чыгыш ясаган.

«Батырлар» программасында җиңү аңа идеяләрен тыныч юл белән тормышка ашырырга мөмкинлек бирә – ветеран экологик проект тәкъдим иткән һәм хәзер аның тирәсенә фикердәшләр командасы тупланган инде.

«Бу юлда Рихат Рушановчика ярдәм итәчәкмен. Программа нәтиҗәләре буенча Түбән Кама файдасына проектны уңышлы гамәлгә ашырырбыз дип ышанам», – дигән Радмир Беляев.

«Батырлар. Татарстан Геройлары» программасы республика Рәисе Рөстәм Миңнеханов инициативасы белән уздырыла һәм махсус операция катнашучыларына һәм ветераннарына ярдәм итүгә юнәлгән. Аның максаты – кадрлар резервы булдыру, лидерлык компетенцияләрен үстерү, хәрбиләрне актив профессиональ тормышка кайтару.

Сайлап алу кысаларында катнашу өчен 1600 кеше гариза тапшырган. Бәйге этабы буенча программага 45 катнашучы сайлап алына. Аларның һәрберсенә тәҗрибәсе һәм белеме белән уртаклашырга әзер булган остаз (хакимият органы җитәкчесе) билгеләнә.