92 ёшли президент саккизинчи муддатга номзод бўлди
0
Камерун Конституциявий кенгаши 12-октабрда бўладиган президент сайловида 92 ёшли президент Пол Бияни рўйхатга олди. Агар Бия ғалаба қозонса, у юз ёшга яқинлашгунга қадар ҳокимиятда қолиши мумкин.
83 номзоддан атиги 12 нафари сайловда қатнашиш ҳуқуқига эга бўлди, қолганлари ҳужжат камчилиги, гаров пули тўланмагани ёки бир партиядан бир нечта номзод кўрсатилгани сабаб четлатилди.
Бия асосий рақиблари қаторида собиқ иттифоқчилари Белло Боуба Маигари ва Исса Тчирома Бакари, ёш сиёсатчи Кабрал Либии, халқаро коррупцияга қарши адвокат Акере Муна ҳамда Социал-демократик фронт етакчиси Жошуа Осиҳ бор.
Таҳлилчилар Либии ёки Муна энг кучли мухолиф номзод бўлиши мумкинлигини айтмоқда. Бироқ узоқ йиллар ҳукумат тизимида бўлган Маигари ва Тчирома мухолифат сайловчиларига ишончли кўринмайди.
Мутахассислар мухолифат ягона номзод атрофида бирлашмаса, Биянинг ғалабаси осон бўлишини таъкидламоқда. 1992-йилда ягона мухолиф номзод билан у зўрға ғалаба қозонган эди, бугун ҳам бундай бирлик бўлмаса, у саккизинчи муддатини қўлга киритиши эҳтимоли юқори.