Женнифер Лопез Тошкентдаги концертидан қанча пул ишлаб кетди?
7 август куни пойтахтимиздаги “Бунёдкор” стадионида жаҳон миқёсидаги юлдуз — Женнифер Лопезнинг Up All Night — LIVE IN 2025 деб номланган концерт дастури юқори даражада ўтказилди. Кўп йиллардан буён катта саҳнада фаолият юритаётган ва миллионлаб мухлисларнинг қалбидан жой олган ижрочининг ушбу концерти ҳақиқий шов-шувга айланди.
Бу борада эълон қилинган рақамлар эса ҳақиқий рекорд натижаларини намоён этмоқда.
Бир кечанинг ўзида сотилган чипталар сони 25 000 тани ташкил этди. Эътиборлиси, шу чипталарнинг 67 фоизи хорижлик томошабинларга тўғри келди. Яъни:
-
7 500 киши Россиядан,
-
2 500 киши Қозоғистондан,
-
қолгани эса Европа мамлакатлари ҳамда Яқин Шарқдан ташриф буюрган ишқий мухлислардир.
Бу ҳолат нафақат Лопезнинг халқаро машҳурлигини, балки Ўзбекистондаги концерт инфратузилмасининг ҳам жаҳон стандартларига жавоб бераётганини тасдиқлайди. Чипталар нархи эса 1 миллион сўмдан бошлаб, 4,2 миллион сўмгача бўлган оралиқда белгиланган.
Шу тариқа ҳисоб-китобларга кўра, концертдан олинган потенциал даромад 25 миллиард сўмдан 105 миллиард сўмгача, яъни 1,97 миллион доллардан 8,28 миллион долларгача бўлиши мумкин. Бу эса фақатги чипта сотувидан тушган даромадни англатади.
Қайд этиш жоизки, мазкур тадбир орқали нафақат шоу-бизнес вакиллари, балки мамлакатнинг туризм сектори ҳам катта фойда кўрди. Минглаб хорижликлар айнан шу концертни томоша қилиш учун 4–6 кунлик тур-пакетлар орқали Ўзбекистонга ташриф буюришди. Бу эса мавсумдан ташқари даврдаги сайёҳлик фаоллигига анча кучли туртки бўлди.
Женнифер Лопезнинг шоу дастури нафақат мусиқа ишқибозларига, балки давлат миқёсида туризм ва тадбиркорлик соҳаларига ҳам ижобий таъсир кўрсатгани билан тарихда қолади. Кўпчилик фойдаланувчилар ижтимоий тармоқларда ўз таассуротларини баҳам кўриб, бундай даражадаги концертларнинг янада кўпайишини орзу қилиб қолишди.
Бу кеча — нафақат юлдузнинг ижроси, балки мамлакат брендининг яна бир қадам олға силжиши сифатида ҳам баҳоланмоқда.