Францияда 75 йилдаги энг йирик ёнғин давом этмоқда

Францияда сўнгги 75 йилда кузатилган энг йирик ўрмон ёнғини ҳануз тўлиқ ўчирилгани йўқ. Париждан каттароқ ҳудудни қамраб олган ёнғин сешанба куни Рибауте қишлоғи яқинида бошланган. Бир аёл ҳалок бўлди, 13 киши, жумладан 11 ўт ўчирувчи жароҳат олди, икки нафари оғир аҳволда.

Ёнғинни бартараф этишга 2 мингдан ортиқ ўт ўчирувчи, 500 та техника ва армия ходимлари жалб қилинган. Сув сепувчи самолёт ва вертолётлар ёрдамида 17 минг гектардан ортиқ ҳудуддаги алангалар назорат остига олинди, аммо тўлиқ ўчириш учун бир неча кун керак бўлиши айтилмоқда.

Ҳудуддаги ўрмонларга камида якшанбагача кириш тақиқланган, йўлларда эса қулаган электр симлари ва бошқа хавфлар мавжуд. Маҳаллий ҳокимият фуқароларга уйларга қайтмасликни тавсия қилмоқда, вақтинчалик турар жой пунктлари очилган.

Бош вазир Француа Байру ёнғинни “мисли кўрилмаган миқёсдаги фалокат” деб атаб, уни глобал исиш ва қурғоқчилик билан боғлади. Атроф-муҳит вазири ҳам иқлим ўзгаришининг ролини таъкидлади. Кучли шамол ва қуруқ ўсимликлар оловнинг тез тарқалишига сабаб бўлган.

Жонкиерес қишлоғининг қарийб 80 фоизи ёнғинда зарарланган. Президент Эммануел Макрон барча давлат ресурслари сафарбар этилганини маълум қилди ва аҳолига максимал эҳтиёт чораларини кўриш зарурлигини эслатди.