Ҳусановнинг дўсти “Жирона” сафида: ёш ҳимоячининг янги мавсумга қадами...
Европа футбол бозорида яна бир ёш иқтидорнинг йўли ўзгарди, деб ёзади mancity.com. “Манчестер Сити” клуби расмий равишда бразилиялик ҳимоячи Витор Рейснинг жамоани тарк этганини маълум қилди. 19 ёшли футболчи 2025/26 йилги мавсум охиригача “Жирона” жамоасига ижарага берилди.
Маълумотларга кўра, “Жирона” City Football Group таркибига киради ва “Манчестер Сити” ушбу холдингнинг асосий клуби ҳисобланади. Бу трансфер икки клуб ўртасидаги ҳамкорлик ва ёш футболчиларни ривожлантириш мақсадида амалга оширилди.
Витор Рейс бу йилнинг бошида “Палмейрас”дан “Манчестер Сити”га келиб қўшилган эди. Ушбу қисқа фаолият давомида ҳимоячи асосий жамоа сафида атиги тўртта ўйинда майдонга тушди ва тўлиқ ишонч қозона олмади. Шундай бўлса-да, унинг иқтидори ва салоҳияти “Жирона”да тўлиқ намоён бўлишига умид қилинмоқда.
Янги мавсум “Жирона” учун 15 август куни “Райо Валекано”га қарши ўйин билан бошланади. Мухлислар Витор Рейснинг янги жамоада қандай ўйин кўрсатишини, унинг Испания чемпионатига қанчалик мослашишини қизиқиш билан кутмоқда.
Бу трансфер ёш футболчилар учун яна бир имконият ва катта саҳнада ўзини кўрсатиш учун янги майдон. Витор Рейс учун эса бу – янги босқич ва янги синовлар. Янги мавсумда “Жирона” сафида ёш ҳимоячининг муваффақиятли фаолиятини биргаликда кузатамиз!