Луиш Фигу ва Роналдиньо Тошкентда футбол шоуси ўтказади

Ўзбекистон футзал ихлосмандлари учун йилнинг энг қизиқарли воқеаларидан бири яқинлашмоқда. 26 август куни мамлакат супер кубоги баҳси бўлиб ўтади. Унда амалдаги чемпион — Жиззахнинг BMB жамоаси ва Бухоронинг “Oil-star” клуби бош соврин учун майдонга тушади.

Бу беллашув нафaқaт спорт жиҳатидан муҳим, балки ўзига хос футбол байрамига айланиши кутилмоқда. Чунки ўйинни томоша қилиш учун дунё футболи афсоналари Луиш Фигу ва Роналдиньо Ўзбекистонга ташриф буюриши режалаштирилган.

Мазкур икки футболчи ўз даврининг энг кучлилари бўлиб, миллионлаб мухлисларнинг юрагидан жой олган. Уларнинг Тошкентга келиши суперкубок баҳсига алоҳида шукўҳ бағишлайди.

Ўзбекистон футзал федерацияси вакиллари маълум қилишича, ушбу учрашув оддий спорт мусобақаси бўлишдан анча йироқ. Ташкилотчилар томошабинлар учун катта шoу тайёрлаш устида иш олиб бормоқда.

“Ҳумо Арена”да ёритиш эффектлари, саҳна безаклари ва маданий чиқишлар орқали ҳақиқий спорт-томоша муҳити яратилади. Бу эса томошабинларда унутилмас таассурот қолдиради.

Эслатиб ўтамиз, ушбу супер кубок баҳси Ўзбекистон футзал тарихида илк бор “Ҳумо Арена”да ўтказилмоқда. Бу арена ўзининг замонавий инфратузилмаси ва қулайликлари билан машҳур.

Чипталарга талаб анча юқори. Айниқса, Фигу ва Роналдиньо иштирок этади деган хабар мухлислар орасида ҳақиқий шов-шувга айланди.

Кўпчилик учун бу ҳаëтда бир маротаба учрайдиган имконият бўлиши мумкин. Улар афсоналарни кўриш, имзо олиш ёки суратга тушиш имкониятига эга бўладилар.

Шундай қилиб, 26 август куни “Ҳумо Арена”да нафaқaт ғолиб номи аниқланади, балки мамлакат спорт тарихида ёдда қоладиган кун сифатида қайд этилади.