Августта Иске Татар бистәсендә татар мәдәниятенә багышланган фестивальләр узачак
Казанның Иске Татар бистәсе августның икенче яртысында милли мәдәнияткә багышланган чаралар сериясе өчен мәйданчыкка әвереләчәк. «Тарихи мохит» муниципаль бюджет учреждениесе директоры Элина Табакчи эшлекле дүшәмбедә хәбәр иткәнчә, традицияләрне саклау һәм иҗади алмашу биредә төп темалар булачак.
26-29 августта «Печән базары» фестивале уза, ул быел кунакларны татар йортының көнкүреше һәм аның традицион бизәлеше белән таныштырачак. Бәйрәм кысаларында һөнәрчелек остаханәләре эшләр, ярминкә оештырылыр, шулай ук тере музыка яңгырар дип көтелә.
27 августта концертлар һәм һөнәрчелек күргәзмәләрен үз эченә алган «Күптөрлелектә бердәмлек» фестивале уза, ә 29 августта бистә Мөхәммәд пәйгамбәрнең туган көне уңаеннан концерт программасын, хәләл-маркет һәм мастер-классларны берләштергән «Мәүлид ән-Нәби» бәйрәмен кабул итәчәк.
Шәһәр көнендә, 30 августта, мода күрсәтү, тере музыка һәм халык күңел ачуларын үз эченә алган «Милли кием» фестивале үткәрелә. Бәйрәм вакытында Мәрҗани урамы артистлар чыгышы, иҗади дискуссияләр һәм сувенирлар ярминкәсен берләштергән җәяүлеләр зонасына әвереләчәк. Чаралар марафоны традицияләрне саклауга һәм популярлаштыруга юнәлдерелгән «Казан сөлгесе» халык җыр-бию сәнгате фестивале белән дәвам итә.
«Бистә борын-борыннан шәһәр тормышының үзәге булган, биредә сәүдә кайнап торган, һөнәрчелек үсеш алган. Һәм ул бүген дә истәлекле урын гына түгел, ә казанлыларның көндәлек тормышының мөһим өлеше булып кала - биредә эштән соң очрашып кофе эчәләр, ял көннәрендә балалар белән йөриләр, концертларга һәм мастер-классларга киләләр», – дип искәртте Элина Табакчи.