Казанда метро станциясе турында татар телендә трек чыкты
Татарстан башкаласында Argen һәм Aaron Voodoo башкаруында татар телендә «Тукай мәйданы» метро станциясе турында трек чыкты. Сингл Scratch DJ School һәм Yummy Music тарафыннан «Музыкаль лаборатория» проектының эш сериясен дәвам итә. Инициатива ТР Рәисе каршындагы телләр буенча комиссия ярдәмендә гамәлгә ашырыла. Бу хакта «Татар-информ»га «Беренчеләр хәрәкәте»нең Татарстан бүлекчәсе матбугат хезмәтендә хәбәр иттеләр.
«Трек Татарстанның гүзәл башкаласына бер генә тапкыр булса да барып кайткан кешеләр өчен динамик сулыш чагылышы булып тора. Локаль сәхнә һәм заманча фольклор мине һәрвакыт дөньякүләм танылган музыкадан күбрәк кызыксындырды, һәм һәрвакыт халык иҗатына яңа караш һәм заманча якын килгән кешеләр сокландырды», - диде башкаручы Argen.
Синглның релизы 30 августта White Place та Шәһәр көне һәм Татарстан Республикасы көнендә узачак TANTANA фестиваленә багышланган.
Хәрәкәтне булдыру турындагы карарны 2022 елның җәендә Россия Президенты Владимир Путин имзалады. «Беренчеләр хәрәкәте» Бөтенроссия оешмасының Татарстан бүлеген республиканың элеккеге Яшьләр министрлыгы башлыгы Тимур Сөләйманов җитәкләде. Республика Координацион советын төзү турындагы карарга 2023 елның 14 февралендә Татарстан Рәисе Рөстәм Миңнеханов имза куйды, ул «Беренчеләр хәрәкәте» белән эшләячәк.