Покистонда муссон фалокати: 160 дан ортиқ инсон ҳалок бўлди
Покистонда кеча, 15 август куни, кучли муссон ёмғирлари ва улар оқибатида келиб чиққан сел ҳамда кўчкилар мамлакат тарихидаги энг оғир фалокатлардан бирига айланди. Le Monde нашри маълумотларига кўра, кучли ёмғирлар туфайли камида 160 нафар фуқаро ҳаётдан кўз юмди.
Энг катта йўқотишлар тоғли Хайбер-Пахтунхва вилоятида кузатилди — бу ерда ҳалок бўлганлар сони 110 нафарга етган. Вилоятнинг Бунер, Бажаур, Мансеҳра ва Баттаграм туманлари фалокат хавфи юқори ҳудудлар сифатида эълон қилинди. Покистон Фавқулодда вазиятлар бошқармаси маълумотларига кўра, мазкур вилоятда яна 60 нафар киши турли даражадаги жароҳатлар олган.
Agence France-Presse тарқатган суратларда Афғонистон чегарасига яқин Бажаурда одамлар лой ва тупроққа кўмилган тепаликларни қўл билан ковлаётгани акс этган. Яқиндаги дала майдонида эса жаноза маросимлари бошланиб, маҳаллий аҳоли мотамга тўлган ҳолда ҳалок бўлган яқинларини охирги сафарга кузатмоқда.
Покистон метеорология хизмати шимоли-ғарбий ҳудудларда кучли ёмғирлар хавфи юқорилигини маълум қилиб, аҳолини хавфли ҳудудларга чиқмасликка чақирди. Ҳиндистон назоратидаги Кашмирда эса қутқарувчилар лой ва вайроналар орасидан жасадларни қидириш ишларини олиб бормоқда.
Муттахассислар фикрича, бу каби табиий офатлар муссон мавсумидаги хавфларни яна бир бор яққол намоён этди. Ҳукумат томонидан қутқарув ишлари кучайтирилиб, қурбонлар сони ошмаслиги учун барча имкониятлар ишга солинмоқда.